SMnewstl.com | BRUXELAS, BELJIKE, 08 NOVEMBRU 2026-Hafoin konklui vizita servisu ofisiál iha Repúblika Korea do Sul, Prezidente Repúblika Demokrátika Timor-Leste, José Ramos-Horta, kontinua nia viajen diplomátika ba Bruxelas, Béljika, hodi kontinua hala’o agenda enkontru no kooperasaun ho parseiru internasionál.
Iha loron dahuluk nia vizita iha Bruxelas, Xefe Estadu simu delegasaun husi organizasaun ANPAS Itália, hodi hala’o enkontru no diskute kona-ba oportunidade kooperasaun, liuliu iha área protesaun sivíl, defeza sivíl no servisu emerjénsia.
Iha enkontru ne’e, ANPAS Itália aprezenta proposta kooperasaun ba Prezidente Repúblika, José Ramos-Horta, ho objetivu atu kontribui ba dezenvolvimentu no haforsa kapasidade komunidade Timor-Leste, liuliu iha área preparasaun no resposta ba situasaun emerjénsia, inklui asisténsia médika.
Proposta kooperasaun ne’e foka ba dezenvolvimentu kapasidade rekursu umanu iha nivel komunidade, liuhusi formasaun ba pesoál primeiru ne’ebé fó resposta iha situasaun emerjénsia (First Responders). Formasaun ne’e sei prepara sidadaun sira atu iha koñesimentu no abilidade nesesária hodi responde lalais ba dezastre naturál no emerjénsia médika iha sira-nia komunidade, antes ekipa asisténsia profisionál sira to’o iha fatin akontesimentu.
Diretor ANPAS, Gabriele Marino Noberasco esplika katak Timor-Leste iha komunidade rurál barak ne’ebé hela iha área difísil atu asesu, ho infraestrutura no rekursu limitadu. Kondisaun ne’e hatudu nesesidade atu haforsa kapasidade komunidade rasik, liuhusi treinamentu no preparasaun, hodi bele fó asisténsia inisiál ba vítima sira no ajuda salva vida iha situasaun emerjénsia.
ANPAS Itália mak organizasaun ho esperiénsia naruk iha área voluntariadu, ne’ebé hahú nia atividade iha Itália iha tinan 1904. Durante liu tinan 122, organizasaun ne’e dezenvolve no implementa programa formasaun ba voluntáriu sira, ho objetivu atu prepara sidadaun sira atu servisu no fó apoiu ba komunidade rasik, liuliu iha situasaun krize no nesesidade umanitária.
Liuhusi enkontru ne’e, ANPAS Itália manifesta disponibilidade atu servisu hamutuk ho Governu Timor-Leste, hodi dezenvolve programa formasaun, inisiativa no projetu kooperasaun sira ne’ebé bele haforsa kapasidade nasionál iha área protesaun sivíl no resposta ba emerjénsia.
Organizasaun ne’e mós manifesta esperansa katak proposta ne’ebé aprezenta ba Prezidente Repúblika bele hetan konsiderasaun no sai baze ba kolaborasaun futuru ho instituisaun relevante sira iha Timor-Leste.
Inisiativa kooperasaun ida-ne’e konsidera importante iha esforsu atu haforsa preparasaun no kapasidade komunidade, tanba komunidade ne’ebé iha koñesimentu, abilidade no treinamentu adekuadu sei iha preparasaun di’ak liu atu responde ba situasaun emerjénsia, hamenus risku no salva vida ema nian.
Komentariu