smnewstl.com||Dili 11 Agostu 2026 — Direksaun Servisu Investigasaun Kriminal (DSIK) Polísia Nasionál Timor-Leste (PNTL) hala’o ona detensaun ba suspeitu ho inisiál JFdA, iha Aldeia Lebumera, Suku Foho-Ailico, Postu Administrativu Hatu-Udu, Munisípiu Ainaro.
Detensaun ne’e hala’o iha 8 Agostu 2026, tuku 14:02 OTL, bazeia ba mandadu detensaun no buska husi Tribunal Judisiál Primeira Instánsia Dili, ho Nú. 0014/25.PGGCC.
Tuir informasaun PNTL, suspeitu JFdA alegadamente iha envolvimentu iha kazu falsifikasaun dokumentu ka notasaun téknika agravada, ne’ebé prevee iha Artigu 303 no Artigu 304, alínea 1, Kódigu Penál Timor-Leste.
Hafoin detensaun no buska iha rezidénsia suspeitu, DSIK-PNTL transporta suspeitu husi Ainaro mai Dili atu kontinua prosesu investigasaun iha edifísiu DSIK, Kuartel Jerál PNTL, Caicoli.
Iha 10 Agostu 2026, Tribunal Judisiál Primeira Instánsia Dili hala’o interrogatóriu no deside aplika medida koasaun Termu Identidade no Rezidénsia (TIR) no Apresentasaun Periódika (AP).
Ho medida ne’e, suspeitu obrigatoriu atu aprezenta-an dala ida kada fulan iha edifísiu komandu PNTL ne’ebé besik.
PNTL liuhusi DSIK afirma katak prosesu investigasaun sei kontinua tuir prosedimentu legal, ho respeitu ba direitu no garantia fundamentál sira.
Komentariu