smnewstl.com | Dili, 10 Agostu 2026 — Prezidente Repúblika José Ramos-Horta klarifika kona-ba jet privadu tipu Cessna Citation ne’ebé aterra iha Aeroportu Internasionál Prezidente Nicolau Lobato, iha 1 Jullu 2026. Prezidente Ramos-Horta hateten katak nia la konvida no la fó autorizasaun ba jet privadu refere atu aterra iha Timor-Leste. Nia mos afirma katak la hatene kona-ba aviaun ne’e nia chegada no la fó permisaun ba ema ka entidade ruma atu uza nia naran hodi autoriza aviaun refere.
Xefe Estadu hateten katak, se iha ema ruma uza nia naran ka kredensiál prezidensiál atu autoriza jet privadu ne’e, ema refere tenke fó esplikasaun ba autoridade kompetente sira.
Prezidente Ramos-Horta mos informa katak Procuradoria-Jerál Repúblika prepara ona relatóriu preliminár no kontinua hala’o investigasaun kona-ba alegasaun utilizasaun la’ós tuir dalan loos ba kredensiál Prezidensiál.
Xefe Estadu hateten nia la hakarak fó komentáriu kona-ba prosesu inkéritu ne’ebé Ministériu Públiku hala’o, no husu atu asuntu refere ko’alia diretamente ho Prokuradór-Jerál Repúblika.
Ramos-Horta reafirma katak instituisaun hotu-hotu Estadu tenke hala’o sira-nia knaar ho independénsia, imparsiálidade no tuir Lei. Nia subliña katak, iha Estadu Direitu, laiha ema ida ne’ebé boot liu Lei.
Nia hatutan katak, se iha ema ruma uza nia naran ba finalidade ne’ebé nia la autoriza, responsabilidade atu klarifika no investiga asuntu ne’e tama iha kompeténsia autoridade judisiál.
“Sé mak uza ne’e komete krime ida, ne’e tama iha PGR nia mandatu no responsabilidade atu investiga no fó esplikasaun kona-ba asuntu ne’e,” afirma Prezidente Ramos-Horta.(SMnews)

Lee nain: 7
Lee Mós:
2025, TL Sai Uma-Na’in ba Enkontru MNE Estadu-Membru g7+