SMnewstl.com DILI|| 23 Abril 2026 – Komandu F-FDTL ofisialmente ensera kursu Lideransa Ofisial Dezemvolvimentu no Treinamentu Pelotaun Apoiu ba Paz, ho total militar nain 57 simu ona sertifikadu hafoin tuir formasaun durante fulan rua.
Reprezentante Xefe Estadu Maior General F-FDTL, Tenente Koronel João Bosco Ximenes “Lenok”, hateten katak kursu ne’e realiza husi CTOAP/CICNL desde 23 Fevereiru to’o 23 Abril 2026, ho apoiu makás husi parseiru Forças de Defesa Australia liu-husi DCP-TL, inklui ekipamentu, materiál no instrutor espesializadu.
Iha nia diskursu, Lenok fó parabéns ba formandu sira hotu ne’ebé konsege kompleta kursu, hateten katak sertifikadu ne’e la’ós deit dokumentu formal, maibé prova real ba esforsu, dixiplina no kompromisu durante prosesu treinamentu.
“Rezultadu diak ohin ne’e mai husi kooperasaun, determinasaun no responsabilidade durante fulan rua. Komandu orgullu teb-tebes ho ita-boot sira,” hateten Lenok.
Kursu ne’e fó énfaze ba lideransa militar no operasaun apoiu ba paz, inklui preparasaun ofisial sira hodi komanda forsa iha misaun manutensaun paz, no mós treinu taktik individual no koletivu ba nivel pelotãu.
Komandante mos destaca katak susesu programa ne’e la bele hakotu deit iha sala aula, maibé tenki implementa iha servisu lor-loron no fahe kunesimentu ba maluk militar sira seluk, atu hasa’e kapasidade institusionál F-FDTL tomak.
Iha okazaun ne’e, Komandu mos hato’o agradese ba apoiu kontinu husi parseiru internasionál, liuliu Forças de Defesa Australia, ne’ebé kontribui diretamente ba dezenvolvimentu profesional militar Timor-Leste.
Eventu ne’e marka pasu importante ida ba fortalese lideransa no prontidaun F-FDTL iha operasaun apoiu ba paz, iha nivel nasional no internasionál. (/SMnews)
Komentariu