Smnewstl.com|LIQUISA 11 Augosto 2026-Eskola Santo Inácio de Loiola kontinua fó kontribuisaun importante ba formasaun estudante sira, liuhusi implementasaun Semana Akadémika no Kulturál, ne’ebé hala’o kada tinan ho objetivu atu dezenvolve kapasidade akadémika, kreatividade, hanoin kritiku no kompeténsia sosial estudante sira.
Atividade ne’e la’ós de’it fó oportunidade ba estudante sira atu hatudu sira-nia koñesimentu iha área akadémika, maibé mos sai espasu ida atu dezenvolve talentu no interese sira iha área kulturál, arte, literatura, desportu no atividade sosial.
Diretór Eskola Santo Inácio de Loiola hateten katak programa Semana Akadémika no Kulturál importante tebes ba dezenvolvimentu estudante, tanba edukasaun la limita de’it ba matéria iha sala aula, maibé tenke inklui mos formasaun karaktere, disiplin, kreatividade no kapasidade atu servisu hamutuk.
Durante atividade, estudante sira partisipa iha konkursu no atividade oioin, inklui debate, apresentasaun akadémika, arte no kultura, ne’ebé permite sira atu dezenvolve konfiansa-an no kapasidade atu ko’alia iha públiku.
Eskola espera katak liuhusi Semana Akadémika no Kulturál, estudante sira bele sai jovem ne’ebé iha koñesimentu, kreatividade, responsabilidade no prontu atu kontribui ba dezenvolvimentu sosiedade no nasaun iha futuru.
Programa ne’e mos reforsa kompromisu Eskola Santo Inácio de Loiola atu kontinua hametin qualidade edukasaun no kria ambiente aprendizajen ne’ebé fó oportunidade ba estudante hotu atu dezenvolve sira-nia poténsia.(Smnews)
Komentariu