Smnewstl.com |Baucau 2 Novembru 2026 – Komemorasaun Loron Matebian la’ós de’it momentu atu lori ai-funan, sunu lilin ka prepara hahán no tua ba tradisaun família, maibé oportunidade importante atu hametin domin ba sira ne’ebé mate ona liuhusi orasaun no fiar iha Maromak nia mizerikórdia.
Mensajen ne’e hato’o husi amu selebrante, Padre Cézar, durante selebrasaun Missa Komemorasaun Loron Matebian, iha Kapela Santa Maria Mazzarello, Lalulai, Segunda-feira (02/11).
Iha nia homilia, Padre Cézar hateten katak Igreja Katólika konvida fiéis hotu atu hanoin no reza ba família no belun sira ne’ebé mate ona, hanesan inan-aman, avó, tiu, tia, maun-alin no ema seluk ne’ebé durante sira-nia moris sai parte importante iha família no komunidade.
Padre ne’e esplika katak, hahán no tua ne’ebé família prepara iha loron ne’e la’ós atu matebian sira mai han, maibé nu’udar parte husi tradisaun ne’ebé ajuda família atu recorda memória no momentu furak sira ne’ebé uluk partilla hamutuk.
“Loron Matebian la’ós de’it atu lori ai-funan ba rate ka prepara hahán di’ak. Maibé, loron ne’e nu’udar oportunidade ba família hotu atu hamutuk iha orasaun ba matebian sira ne’ebé presiza ita-nia tulun. Maski ita iha tradisaun atu han hamutuk, importante liu mak molok han, ita tenke reza uluk ba sira no husu mós Missa ba sira,” dehan Padre Cézar.
Padre Cézar enfatiza katak orasaun mak hahalok espirituál importante ida atu hatudu domin ba matebian sira, tanba fiar-na’in sira fiar katak Maromak nia mizerikórdia bele simu no fó naroman ba klamar sira.
Bibi atau nee mós apela ba família ida-idak atu la limita sira-nia orasaun ba membru família rasik, maibé inklui matebian hotu, liuliu sira ne’ebé la iha família atu hanoin ka reza ba sira.
Tuir Padre Cézar, matebian sira ne’ebé fiar iha Kristu, maski mate ona, kontinua iha esperansa moris fali iha Kristu no hetan moris rohan-laek iha Lalehan.
Tanba ne’e, nia konvida fiéis sira atu uza komemorasaun ne’e nu’udar oportunidade atu hafoun fiar, hametin solidariedade espirituál no kontinua hatudu domin liuhusi orasaun, husu Maromak nia mizerikórdia ba matebian sira.
Amo celebrante ne’e subliña katak domin ba ema ne’ebé mate ona la’ós de’it recorda sira-nia naran ka halo tradisaun tinan-tinan, maibé mós kontinua reza no entrega sira ba Maromak ho fiar no esperansa.
Komentariu