Smnewstl.com — Ministru Prezidénsia Konsellu Ministru, Fidélis Magalhães, husu estudante timoroan sira ne’ebé eskola iha estrajeiru, atu kumpre nafatin regras saúde nian, nune’e bele proteje aan husi variante foun sira.
“Tanba ne’e mak esforsu boot ne’ebé governu halo hela, mais husu mós bá ita-nia estudante sira iha li’ur, atu sira hola medida hotu par proteje sira-nia aan, tanba ita iha preukupasaun difisil ida, parte ida ita hakarak garante ita-nia alin estudante sira iha li’ur hetan protesaun másimu iha li’ur, mais iha seluk, ita mós husu sira atu labele komete neglijénsia ou irresponsabilidade balun ké ariska sira-nia aan, maibé mós loke fali dalan sira lori moras mai fali ita-nia rai laran,” dehan Ministru Fidélis Magalhães, kuarta (28/07/21) iha Palásiu Governu.
Porta-voz ne’e hatutan, konstituisaun Repúblika Demokrátika Timor-Leste (RDTL) fó dalan bá timoroan sira iha li’ur hakarak atu fila mai Timór.
Maibé, governante ne’e mós husu bá estudante sira-ne’e, bainhira atu fila mai rai moris fatin, sira tenki kumpre nafatin regras saúde nian, nune’e bele preve moras variante Delta no Covid-19 labele hada’et bá sira-nia família.
“Entaun saida mak ita halo.? Sé ita-nia sidadaun sira mak iha li’ur hakarak fila, ou tanba kondisaun iha ne’ebá la permite sira hakarak fila, ita buka dalan atu sira bele fila, maibé ita mós asegura katak, sira kumpre rekizitus sira hanesan kuarentena par ita bele identifika sé karik sira lori variante iha sira-nia isin, tanba sé moras ne’e lori mai rai laran karik, moras ne’e sei hada’et bá sira-nia inan-aman sira ne’ebé iha rai laran,” dehan nia.
Nune’e Fidélis Magalhães afirma, governu kontinua halo jestaun bá pontu entrada hanesan fronteira terrestre, portu no aeroportu, nune’e evita ema tama ilegál hodi lori vírus Covid-19 no variante Delta mai Timor-Leste.(ant)
Komentariu