Smnewstl.com | MANILA, Filipinas, 15 Novembru 2026 – Prezidente Filipinas, Ferdinand R. Marcos Jr., husu ba líder nasaun membru ASEAN sira atu hametin unidade, solidariedade no kooperasaun rejionál hodi kombate krime transnasionál, tráfiku umanu, krime sibernétiku no fraude online ne’ebé sai dezafiu ba seguransa no estabilidade iha rejiaun Sudeste Aziátiku.

Apelu ne’e hato’o Marcos Jr. iha nia diskursu abertura 49.ª Simeira ASEAN, ne’ebé hala’o iha Philippine International Convention Center (PICC), Pasay City, Manila, iha Domingu (15/11).

ADVERTISEMENT
SCROLL FILA BA NOTISIA


Marcos Jr. afirma katak enkontru entre líder ASEAN no parseiru externu sira durante loron tolu sei sai oportunidade importante atu foti desizaun estratéjika hodi determina kapasidade organizasaun rejionál ne’e atu responde ba dezafiu atual, aproveita oportunidade futuru no prepara rejiaun ba jerasaun sira tuirmai.

Lee Mós:
Partus Iha Haris Fatin ,Bebé Mate:PNTL Loke investigasaun

“Durante loron sira tuirmai, hamutuk ho parseiru esternu sira, desizaun ne’ebé ita foti sei determina oinsá ASEAN responde ba dezafiu ohin loron, aproveita oportunidade aban-bainrua no prepara rejiaun ba jerasaun sira tuirmai,” dehan Marcos Jr. iha nia diskursu.

Nia mós enfatiza nesesidade atu hametin kooperasaun marítima, liuliu atu responde ba ameasa no dezafiu seguransa transnasionál ne’ebé bele afeta estabilidade rejionál.

Iha diskursu ne’e, Marcos Jr. refere mós ba símbolu Balangay, ró tradisionál Filipinas, ne’ebé reprezenta unidade, konfiansa, kapasidade atu adapta ba mudansa no kompromisu hamutuk hodi atinji objetivu komún.

Lee Mós:
Don Virgílio to'o Ona Roma, Deskansa iha Kaza Santa Marta Vaticano

Tuir nia, hanesan Balangay ne’ebé presiza ema hotu iha ró atu halo viajen hamutuk, ASEAN mós presiza konfiansa no kompromisu hosi nasaun membru sira atu avansa ba futuru komún.

49.ª Simeira ASEAN ne’e hala’o ho tema “Navigating Our Future Together” (Navega Hamutuk ba Futuru), ho Filipinas nu’udar nasaun ne’ebé kaer Prezidénsia ASEAN ba tinan 2026.

Durante serimónia abertura, aprezenta mós símbolu foun ASEAN, inklui bandeira no sertifikadu ASEAN ho formatu atualizadu.

Lee Mós:
ME sei Duplika Komprimissu Fiskal ba Merenda Eskolar

Iha okaziaun ne’e, Hla Hla Aung hosi Mianmar simu Prémiu ASEAN 2026, nu’udar rekoñesimentu ba nia kontribuisaun iha área peskiza, jestaun no preparasaun ba dezastre.

49.ª Simeira ASEAN no Simeira Relasionada hala’o hosi 15 to’o 17 Novembru 2026, iha Manila, ho partisipasaun líder hosi nasaun membru ASEAN no parseiru sira, hodi diskute asuntu estratéjiku sira kona-ba kooperasaun ekonómika, seguransa, estabilidade no dezenvolvimentu rejionál.

Timor-Leste, nu’udar membru ASEAN ba-11, partisipa iha enkontru importante ne’e liuhosi Primeiru-Ministru Kay Rala Xanana Gusmão, hamutuk ho líder hosi nasaun membru ASEAN sira seluk.