Smnewstl.com | KUPANG, 6 Novembru 2026 – Istória, kultura no relasaun maun-alin ne’ebé liga povu Timor-Leste ho povu Nusa Tenggara Timur (NTT), Indonézia, kontinua sai baze importante atu harii futuru ne’ebé di’ak liután ba komunidade sira iha illa Timor.
Iha esforsu atu hametin ligasaun istórika ne’e, Primeiru-Ministru Timor-Leste, Kay Rala Xanana Gusmão, hasoru malu ho eis-Governadór Provínisa NTT, Viktor Bungtilu Laiskodat, iha serimónia janta hamutuk ne’ebé hala’o iha Wisma Alak, Kupang, Indonézia.
Enkontru ne’e realiza tuir konvite hosi Laiskodat, no sai oportunidade importante ida ba líder rua ne’e atu troka hanoin kona-ba importánsia relasaun amizade no futuru kooperasaun entre Timor-Leste ho Provínisa NTT.
Iha diálogu ne’e, Laiskodat hatudu oportunidade boot atu dezenvolve kolaborasaun iha área edukasaun, agrikultura, pekuária no teknolojia. Nia haree katak setór sira-ne’e iha potensiál atu loke oportunidade foun ba komunidade, liuliu iha área dezenvolvimentu rekursu umanu no ekonomia lokál.
Kooperasaun iha edukasaun bele aumenta asesu ba koñesimentu no kapasidade jerasaun foun, enkuantu iha agrikultura no pekuária bele kontribui diretamente ba hadi’a produsaun, rendimentu no kondisaun moris agrikultór no hakiak-na’in sira.
Iha tempu hanesan, dezenvolvimentu teknolojia no oportunidade negósiu bele sai dalan ida atu habelar ligasaun ekonómika no kria benefísiu ne’ebé komunidade sira bele sente diretamente, inklui sira ne’ebé hela iha área remota.
Lider rua ne’e mós subliña katak Timor-Leste no NTT fahe illa ida de’it, ho istória no kultura ne’ebé liga povu rua ne’e durante tempu naruk. Ligasaun ne’e la’ós de’it relasaun jeográfika, maibé mós relasaun sosial no kulturál ne’ebé presiza kontinua hametin hosi jerasaun ba jerasaun.
Tanba ne’e, vizaun atu dezenvolve territóriu rua ne’e hamutuk sai importante tebes, hodi asegura katak amizade ne’ebé iha la’ós de’it hela iha nivel relasaun pesoál ka istórika, maibé transforma sai kooperasaun konkretu ne’ebé lori benefísiu ba povu.
Iha kontestu ne’e, enkontru entre Xanana Gusmão no Viktor Bungtilu Laiskodat sai hanesan sinal ida katak ligasaun istórika bele sai pontu partida atu harii oportunidade foun ba dezenvolvimentu, prosperidade no progresu komun.
Amizade ne’ebé mantein metin, konfiansa ne’ebé harii no kooperasaun ne’ebé konkretu sei sai fundamentu importante ba futuru Ilha Timor, atu povu sira iha sorin rua fronteira bele moris hamutuk iha dame, unidade no dezenvolvimentu ne’ebé inkluzivu.
Komentariu