Smnewstl.com | Bobonaro, 1 Novembru 2026 – Konfrontu iha Suku Maliubu, Postu Administrativu Bobonaro, Munisípiu Bobonaro, obriga Polísia Nasionál Timor-Leste (PNTL) atu halo intervensaun operasionál, ne’ebé rezulta ema na’in-haat (4) ne’ebé deskonfia envolve iha problema ne’e hetan kaptura, no ema na’in-ida (1) sofre kanek.
Intervensaun ne’e hala’o iha loron 31 Outubru 2026, hosi Batalhaun Operasionál Polísia (BOP) Companhia Delta, lidera hosi Inspetór Asistente Polísia Celestino Freitas Ornai, hamutuk ho Eskuadra Polísia Bobonaro.
Tuir relatoriu ne’ebé Fo sai husi Pajina Ofisiál PNTL-Unidade Espesiál Polisia (UEP), Hatete Durante operasaun, konfrontu ne’e rezulta ema na’in-ida (1) hetan kanek. Vitima hetan kedas asisténsia médika iha Postu Saúde Cile atu simu tratamentu.
Depois de halo intervensaun, ema na’in-haat ne’ebé deskonfia envolve iha problema ne’e entrega ona ba Eskuadra Polísia Bobonaro atu kontinua prosesu tuir lei ne’ebé vigora iha Timor-Leste.
PNTL informa katak, depois de intervensaun ne’e, situasaun iha terenu normaliza ona. Autoridade seguransa kontinua mantein kontrolu atu garante estabilidade no seguransa públika iha área ne’e.
,
Tuir Karta avizu ne’ebé Smnews Asesu katak,Autoridade Postu Administrativu Bobonaro emite ona sirkuláru ho númeru 144/APA BOB/X/2026, ne’ebé bandu atividade piknik, turizmu no konsuu tua iha área públika durante selebrasaun Loron Finadu, hahú hosi 31 Outubru to’o 4 Novembru 2026.
Iha sirkulár ne’e, Administradór Postu Bobonaro, Thomas B. Henriques, esplika katak Loron Finadu mak tempu atu reza no hato’o orasaun ba matebian, la’ós loron atu halo festa.
Tanba ne’e, autoridade bandu sidadaun sira atu ba piknik ka halo atividade turizmu iha fatin turístiku sira, ne’ebé sei taka durante períodu bandu.
Aleinde ne’e, sidadaun sira mós labele hemu tua iha dalan no loja, no labele halo barullu besik rate ka semitériu, atu respeita matebian no família sira.
Sirkulár ne’e determina katak bandu hahú hosi 31 Outubru tuku 18:00 to’o 4 Novembru 2026 tuku 18:00. Ba sidadaun ne’ebé la kumpri regra ne’e, Polísia Nasionál Timor-Leste (PNTL) sei konfiska tua no lori ba postu polísia.
Autoridade Postu Bobonaro husu komunidade hotu-hotu atu kumpri regra ne’ebé estabelese ona, hodi mantein ambiente hakmatek, respeitu no dignidade durante selebrasaun Loron Finadu.
Komentariu