Smnewstl.com | Busan no Gwangju, 24–25 Outubru 2026 — Vice-Ministru Administrasaun Estatál (MAE), Jacinto Rigoberto Gomes de Deus, hamutuk ho Komisária Komisaun Nasionál Eleisaun (CNE), Odete Belo, no delegasaun ofisiál hosi CNE, STAE, MAE, MNEC no BNCTL, akompañadu hosi Embaixadór Timor-Leste iha Koreia do Sul, hala’o viajen servisu ba sidade Busan no Gwangju atu hasoru komunidade Timoroan sira no apoia prosesu resenseamentu eleitorál.
Durante enkontru ho komunidade Timoroan sira, Vice-Ministru Jacinto Rigoberto Gomes de Deus agradese ba sidadaun sira ne’ebé partisipa iha prosesu resenseamentu eleitorál, maski iha responsabilidade no atividade profisionál loroloron.
Nia esplika katak,resenseamentu eleitorál nia objetivu mak atu atualiza dadus eleitorál sidadaun sira nian, inklui troka Kartaun Eleitorál Manuál ba Kartaun Eleitorál Biométriku.
Tuir nia, prosesu ne’e mós importante atu determina númeru eleitor sira iha kada rejiaun, hodi fasilita planeamentu no organizasaun sentru votasaun ne’ebé besik liu ba komunidade Timor-Leste sira ne’ebé hela iha rai-li’ur.
Iha oportunidade ne’e, Vice-Ministru enfatiza katak resenseamentu eleitorál nu’udar obrigasaun konstitusionál, nune’e nia enkoraja sidadaun sira ne’ebé seidauk rejista atu aproveita oportunidade ne’e hodi kompleta sira-nia rejistu eleitorál.
Nia mós husu komunidade Timoroan sira atu ajuda sensibiliza no informa família, kolega no maluk sira seluk kona-ba importánsia atualiza dadus eleitorál, atu sidadaun hotu bele partisipa iha prosesu demokrátiku.
Iha parte ikus, Vice-Ministru Jacinto Rigoberto hato’o apresiasaun ba partisipasaun ativa komunidade Timoroan iha Koreia do Sul, no subliña katak envolvimentu sidadaun sira iha prosesu eleitorál, liuliu liuhosi ezekísiu direitu votu, iha papél importante atu hametin demokrasia no kontribui ba dezenvolvimentu nasaun nian.
Komentariu