SMnewstl.com | Dili, 27 Outubru 2026- Preparativu ba Eleisaun Prezidensiál Timor-Leste 2027 tama ona iha etapa avaliasaun inisiál, ho Ministériu Administrasaun Estatál (MAE) no Uniáun Europeia (UE) hahú diskute kona-ba posibilidade atu haruka misaun observasaun eleitorál mai Timor-Leste.
Ministru Administrasaun Estatál, Tomás do Rosário Cabral, hala’o enkontru ho Embaixadór UE iha Timor-Leste, Thorsten Bargfrede, no delegasaun Misaun Esploratória UE nian, iha Edifísiu MAE, Dili, atu analiza situasaun eleitorál no preparativu ba eleisaun ne’ebé sei realiza iha Marsu 2027.
Enkontru ne’e foka ba kondisaun sira ne’ebé presiza konsidera molok foti desizaun kona-ba implementasaun Misaun Observasaun Eleitorál UE, inklui koordenasaun ho instituisaun nasionál relevante sira.
Depois enkontru, Ministru Tomás do Rosário Cabral informa ba média katak,vizita delegasaun esploratória ne’e hala’o tuir konvite husi Prezidente Repúblika, ho objetivu atu halo avaliasaun inisiál kona-ba preparativu ba eleisaun prezidensiál.
Ministru Tomás subliña katak, atu apoia prosesu eleisaun ne’ebé kualidade no transparénsia, númeru observadór tenke adekuadu, hodi permite misaun observasaun estende nia prezensa ba munisípiu sira hotu, la’ós limita de’it iha kapitál Dili.
Durante vizita, delegasaun UE sei hasoru mós instituisaun relevante sira atu halibur informasaun kle’an kona-ba situasaun eleitorál no nesesidade sira ne’ebé presiza konsidera iha prosesu planeamentu misaun observasaun.
Avaliasaun ne’e sei sai baze importante ba desizaun kona-ba posibilidade atu haruka Misaun Observasaun Eleitorál Uniáun Europeia ba Eleisaun Prezidensiál Timor-Leste 2027.
Enkontru ne’e akompaña mós husi Xefe Gabinete MAE, Benigno H. da Cruz, no Asesór Jurídiku MAE, Nuno Machado Rais.
Komentariu