SMNewsTL.com | Dili, 13 Agostu 2026 — Ekipa Servisu Operasaun hosi Servisu Migrasaun hala’o operasaun rutina iha área Hudi Laran, Suku Bairo-Pite, Postu Administrativu Dom Aleixo, no konsege asegura sidadaun estranjeiru na’in 10.
Hosi verifikasaun liuhosi Sistema Jestaun Fronteira, ekipa Migrasaun deskobre katak sidadaun estranjeiru na’in 7 suspeitu viola kondisaun vistu, tanba uza vistu turista hodi hala’o atividade komersiál ka buka lukru.
Enkuantu sidadaun estranjeiru na’in 3 seluk, maske sira uza vistu servisu, detekta katak sira hala’o atividade la tuir fatin servisu ne’ebé autorizadu iha sira-nia vistu.
Informasaun hosi ekipa operasaun hatudu katak estranjeiru hirak ne’e uza vistu la tuir objetivu no kondisaun ne’ebé autoridade migrasaun fó ba sira.
Hafoin identifika indikasaun violasaun, Ekipa Servisu Migrasaun halo planeamentu no hala’o buka-tuir to’o konsege lokaliza sidadaun estranjeiru na’in 10 iha karaoke ida, iha área Hudi Laran, Dili Oeste.
Sidadaun estranjeiru na’in 10 agora hela iha kontrolu Servisu Migrasaun hodi hala’o verifikasaun no prosesa tuir prosedimentu lei migrasaun ne’ebé vigora iha Timor-Leste.
Servisu Migrasaun hateten sei kontinua aumenta fiskalizasaun ba sidadaun estranjeiru iha territóriu Timor-Leste, liuliu atu asegura katak sira uza vistu tuir objetivu autorizadu no la hala’o atividade ne’ebé kontra lei migrasaun.
Operasaun ne’e parte husi esforsu Servisu Migrasaun atu garante sidadaun estranjeiru kumpre regra no kondisaun sira ne’ebé aplika durante sira hela iha Timor-Leste.
Komentariu