SMnewstl.com || DÍLI, 17 Agostu 2026 — Sekretária Ezekutiva Komunidade Países de Língua Portuguesa (CPLP), Embaixadora Maria de Fátima Jardim, akompaña hosi Diretór Ezekutivu Institutu Internasionál da Língua Portuguesa (IILP), João Neves, hamutuk ho delegasaun, Segunda-feira ne’e to’o ona iha Timor-Leste.
Delegasaun CPLP to’o iha Aeroportu Internasionál Presidente Nicolau Lobato, Díli, liu hosi aviaun Citilink, ho objetivu atu partisipa iha 31.ª Reuniaun Ordinária Konsellu Ministru CPLP, ne’ebé sei hala’o iha Díli.
Delegasaun ne’e simu iha aeroportu hosi Diretora-Jerál ba Asuntus Konsulares no Protokolares, Josefina Pompeia Tilman.
31.ª Reuniaun Ordinária Konsellu Ministru CPLP sei realiza iha Díli, iha loron 19 Agostu 2026, no sei prezide hosi Ministru Negósiu Estranjeiru no Kooperasaun Timor-Leste, Bendito dos Santos Freitas, ne’ebé atualmente nu’udar Ministru Prezidénsia Konsellu Ministru CPLP Pro Tempore ba períodu 2026–2027.
Reuniaun ne’e sei envolve partisipasaun hosi reprezentante sira husi Estadu-Membru CPLP, hodi diskute no konsidera asuntu estratéjiku sira relasiona ho kooperasaun, agenda komún no prioridade sira hosi organizasaun CPLP.
Enkuantu Timor-Leste hala’o Prezidénsia Pro Tempore CPLP, reuniaun ne’e sei sai mós oportunidade importante atu hametin kooperasaun entre Estadu-Membru no promove prioridade komún iha espasu CPLP.
Partisipasaun hosi Sekretária Ezekutiva CPLP no Diretór Ezekutivu IILP mos hatudu importánsia koordenasaun entre instituisaun CPLP sira, liuliu iha área língua portuguesa, kooperasaun no dezenvolvimentu agenda komún organizasaun.(SMnews)
Komentariu