Smnewstl.com Dili 21 Outubro 2026- Ministériu Komérsiu no Indústria (MCI) garante disponibilidade stock ai-han iha merkadu nasionál atu responde ba nesesidade populasaun nian, liuliu durante selebrasaun Loron Finadu no atu antisipa impaktu fenomena El Niño, ne’ebé bele hamosu bailoro naruk no menus udan iha Timor-Leste.
Ministru Komérsiu no Indústria Nino Pereira, hateten katak,Governu kontinua halo intervensaun atu asegura fornesimentu ai-han iha merkadu nasionál liuhusi Centro Logística Nacional (CLN), ho alokasaun orsamentu besik US$ 5 millaun atu apoia no garante disponibilidade ai-han iha rai laran.
Governante ne’e esplika katak koordenasaun entre MCI no entidade nasionál sira, inklui instituisaun sira iha setór agrikultura, kontinua hala’o atu responde ba impaktu mudansa klimátika, liuliu menus udan ne’ebé bele afeta produsaun ai-han no disponibilidade produtu lokál.
Ministru Nino Pereira afirma katak,produtu lokál kontinua disponivel iha merkadu, inklui ai-han tradisionál ne’ebé mai husi postu administrativu no munisípiu sira, hanesan fehuk, talas, ai-farina no produtu seluk ne’ebé komunidade konsume loroloron.
Iha parte seluk, Ministro mós esplika katak produtu ai-han ne’ebé tama husi rai li’ur sei liu prosesu kontrolu iha alfândega no karantina, atu asegura katak importasaun tuir prosedimentu no dokumentasaun ne’ebé ezije.
MCI kontinua fó atensaun ba disponibilidade stock ai-han iha merkadu nasionál atu minimiza risku falta ai-han no asegura katak populasaun iha territóriu nasionál bele asesu ba nesesidade bázika, liuliu durante selebrasaun Loron Finadu no iha posibilidade impaktu El Niño.(#Smnews/)
Komentariu