Smnewstl.com | Dili, 21 Outubru 2026 – Austrália sei fó apoiu finanseiru ho montante 62 milhaun dólar australianu durante tinan lima tuirmai, inklui ró patrulha foun tolu ba Polísia Nasionál Timor-Leste (PNTL), hodi hametin kapasidade seguransa sibernétika, seguransa marítima no kombate krime iha Timor-Leste.
Apoiu ida-ne’e anunsia husi Vise-Primeiru-Ministru no Ministru Defeza Austrália, Richard Marles, hafoin hala’o enkontru ho Primeiru-Ministru Timor-Leste, Kay Rala Xanana Gusmão, no autoridade sira seluk, iha Ministériu Defeza, Fatuhada, Dili, iha loron 21 Outubru 2026.
Richard Marles esplika katak,pakote apoiu ne’e nu’udar parte importante husi parseria entre Austrália no Timor-Leste, ne’ebé kontinua dezenvolve liuhusi kooperasaun iha área defeza no seguransa.
Nia hateten katak akordu kooperasaun defeza foun ne’e sei sai baze atu hametin koordenasaun entre nasaun rua, liuliu iha formasaun, edukasaun, dezenvolvimentu kapasidade militár no ezersísiu defeza konjuntu.
Iha área seguransa marítima, Austrália sei apoia PNTL ho ró patrulha foun tolu, atu haforsa kapasidade polísia nian iha monitorizasaun no seguransa tasi. Aleinde ne’e, apoiu ba investigasaun forénsika dijitál mós sei ajuda autoridade sira atu hadi’a kapasidade investigasaun no kombate krime sibernétiku.
Pakote apoiu ne’e mós inklui asisténsia atu hametin preparasaun no resposta ba dezastre naturál, nune’e mós dezenvolvimentu kapasidade seguransa sibernétika iha Timor-Leste.
Marles afirma katak,kooperasaun defeza entre nasaun rua iha ona istória naruk, inklui parseria ho Forsa Defeza Timor-Leste (F-FDTL) no Ministériu Defeza desde 2002, no ezersísiu konjuntu hanesan Ezersísiu Hari Hamutuk.
Ho akordu foun ne’e, Austrália no Timor-Leste sei kontinua hametin kooperasaun iha área defeza no seguransa, hodi dezenvolve kapasidade institusionál no prepara resposta ba dezafiu seguransa iha futuru.(#Smnews/)
Komentariu