Smnewewstl.com | Dili, 21 Outubru 2026 – Konsellu Ministrus (KM) aprova ona proposta lei ha’at atu halo alterasaun ba lejizlasaun eleitorál no rejistu eleitorál, ho objetivu atu moderniza sistema eleitorál, hadi’a prosesu rejistu sidadaun no fasilita asesu ba direitu votu nian.
Proposta lei haat ne’e aprezenta husi Ministru Administrasaun Estatál, Tomás do Rosário Cabral, no inklui alterasaun ba Lei Eleitorál Munisipál, Lei Resenseamentu Eleitorál, Lei Eleitorál ba Parlamentu Nasionál no Lei Eleitorál ba Prezidente Repúblika.
Iha área rejistu eleitorál, Governu propoin atu hametin dijitalizasaun liuhusi utilizasaun formuláriu eletróniku no rekolla dadus biométriku, inklui fotografia no impresaun dijitál (liman-fuan) eleitór nian. Proposta ne’e mós inklui introdusaun kódigu QR iha kartaun eleitorál, nu’udar elementu foun atu hametin seguransa no hadi’a jestaun dadus eleitorál.
Aleinde modernizasaun rejistu, proposta alterasaun lei sira ne’e mós foka ba hadi’a asesibilidade prosesu votasaun nian, liuliu ba ema ho defisiénsia. Medida sira ne’ebé propoin inklui uza modelu boletin votu iha letra Braille, fasilidade ba eleitór sira ho difikuldade movimentu no votu asistidu iha situasaun ne’ebé lei permite.
Governu mós propoin atu estende oras votasaun iha estranjeiru to’o tuku 8 kalan ba eleisaun Prezidente Repúblika no Parlamentu Nasionál, hodi fasilita sidadaun Timor-Leste sira ne’ebé hela iha diáspora atu partisipa iha prosesu eleitorál.
Iha parte seluk, proposta sira ne’e inklui atualizasaun rekizitu ba aprezentasaun kandidatura, ajustamentu númeru ofisiál eleitorál tuir númeru eleitór rejistadu iha sentru no estasaun votu, no hadi’a organizasaun prosesu eleitorál.
Ba eleisaun munisipál, proposta ne’e prevee katak kandidatura ba Prezidente no Vise-Prezidente Munisípiu ne’ebé aprezenta husi grupu sidadaun tenke halibur apoiu pelumenus 5% husi eleitór rejistadu iha munisípiu, no inklui proponente na’in 50 husi kada subunidade ne’ebé forma parte husi munisípiu ne’e.
Proposta lei haat ne’e sei buka armoniza kuadru legál eleitorál, adapta sistema ba dezenvolvimentu teknolojia no hadi’a asesu sidadaun sira nian ba prosesu votasaun no rejistu eleitorál.
Iha enkontru ne’e, Konsellu Ministrus mós aprova tema “Tinan 51 Istória – Konsolida Estabilidade no Promove Dezenvolvimentu Sustentável” ba komemorasaun tinan 51 Proklamasaun Independénsia Unilaterál Repúblika Demokrátika Timor-Leste nian.(#Smnews/)
Komentariu