SMnewstl.com | Dili, 07 Maiu 2026 – Prezidenti Autoridade Nasionál Lisensiamentu Ambiental (ANLA), I.P., halo klarifikasaun públiku kona-ba projetu rehabilitasaun estrada Gleno–Letefoho no Letefoho–Lourba, depois de iha akuzasaun katak ANLA mak sai razaun ba atrazu implementasaun projetu refere.
Tuir ANLA, Lisensa Ambiental ba Projetu Rehabilitasaun Estrada Letefoho–Lourba emite ona iha tinan 2024, enkuantu lisensa ba Projetu Gleno–Letefoho emite iha data 30 Maiu 2025. Ho emisaun lisensa hirak ne’e, kompanhia sira konsidera ona bele hahú atividade konstrusaun.
Liu husi konferensia imprensa, Prezidente ANLA Maximiliano de Oliveira esplika katak, aleinde projetu prinsipál, instituisaun ne’e mos aprova ona Lisensa Ambiental ba projetu estrada asesu Kolkoli–Katrai Kraik (8 kilometru), ne’ebé dokumentu submete husi Kompañia China Civil Engineering iha data 3 Jullu 2025 no lisensa sai iha 11 Jullu 2025, atu fasilita transporte material ba obra.
Maibé, dokumentu ne’ebé seidauk remata mak kona-ba Site Camp ka akampamentu traballador sira nian. ANLA hateten katak dokumentu Deklarasaun Impaktu Ambiental Simplifikada (DIAS) foin submete iha 21 Abril 2026 no Planu Jestaun Ambiental (PJA) iha 28 Abril 2026, no agora daudauk sei iha prosesu avaliasaun.
Segundo ANLA, dokumentu sira ne’e seidauk kompletu tuir rekezitu legal bazeia ba Decreto-Lei Nú.39/2022 kona-ba Lisensiamentu Ambiental.
Maske nune’e, ANLA afirma katak kompanhia konstrutora hasoru ona Prezidenti no ekipa tekniku ANLA hodi husu autorizasaun atu hahú atividade. Instituisaun ne’e hateten katak parte ANLA fo ona autorizasaun, inklui verbalmente, ba kompanhia atu komesa servisu maski lisensa ambiental ba Site Camp seidauk emite oficialmente.
Ho klarifikasaun ida-ne’e, ANLA konsidera katak instituisaun la halo impedimentu ba implementasaun projetu estrada refere no aseita kompanhia atu kontinua atividade rehabilitasaun durante prosesu lisensiamentu akampamentu sei lao hela. (/SMnews)
Komentariu