SMnewstl.com | MALIANA, 18 Abril 2026 – Primeiru-Ministru Kay Rala Xanana Gusmão ofisialmente inaugura estrada urbana iha Maliana, Munisípiu Bobonaro, hanesan parte husi esforsu governu atu hadia infraestrutura no impulsiona dezenvolvimentu rejionál.
Primeiru-Ministru hato’o katak projetu estrada ne’e la’ós de’it konstrusaun fisika, maibé mos sai símbolu ida ba komitmentu governu nian atu hasa’e kualidade moris povu liu husi asesu transporte ne’ebé di’ak.
Nia afirma katak estrada ne’e sei fasilita ligasaun entre komunidade sira, hamenus tempu viajen no fó apoiu ba atividade ekonomika, liu-liu iha setór agrikultura no komérsiu lokal.
Iha oportunidade ne’e, Ministru Obras Públikas, Samuel Marçal, hato’o katak dezenvolvimentu estrada foun sira iha rai laran sei fó benefísiu boot ba komunidade sira, liu-liu iha asesu ba merkadu, edukasaun no servisu saúde.
Governu esplika katak ho infraestrutura estrada ne’ebé di’ak, sidadaun sira bele viajen ho fasilidade no seguru liu, hodi hamenus tempu no kustu transporte.
Nune’e mos, estrada sai fator importante atu liga suku sira ho sentru ekonomia no servisu públiku.
Projetu estrada urbana iha Maliana vila ne’e iha distánsia 4.91 km ho luan 23 metru, no hetan orsamentu husi Fundu Infraestrutura hamutuk ho valor liu USD 21 miliaun, implementa husi kompañia Hutama Karya.
Durante implementasaun projetu, prosesu supervizaun no inspesaun kontinua hala’o ho parte relevante sira, inklui Agência de Desenvolvimento Nacional, atu asegura katak servisu konstrusaun tuir padraun tékniku, kualidade no transparénsia ne’ebé estabelese ona.
Dezenvolvimentu infraestrutura iha nível munisípal ne’e sei kontribui direta ba kresimentu ekonomia lokal, liu-liu hodi hasa’e movimentu produtu agríkola no atividade komersiál.
Governu kontinua kompromete atu investe iha infraestrutura estratéjika ho objetivu atu asegura dezenvolvimentu ne’ebé inklusivu no sustentável iha Timor-Leste. (/SMnews)
Komentariu