Smnewstl.com—Asuntu ne’e hato’o hosi Vise Ministra Parlamentár bá Negósiu Estranjeiru Japaun, Ikuina Akiko, hafoin hala’o enkontru ho Primeiru-Ministru (PM), Kay Rala Xanana Gusmão iha Palásiu Governu, kinta (24/07/2025).
“Ha’u hato’o ha’u-nia parabéns katak Timor-Leste sei hetan admisaun ofisiál bá iha ASEAN. Ho hanoin atu sai membru plenu ASEAN nian, ha’u subliña ita-nia kooperasaun kontinua iha área kapasitasaun bá instituisaun administrativa sira, dezenvolvimentu infraestrutura, diversifikasaun industriál, kuidadu saúde no agrikultura,” Ikuina Akiko hateten hafoin enkontru.
Ikuina Akiko foin hala’o vizita dahuluk mai Timor-Leste no foin hetan oportunidade hodi hala’o vizita kortezia bá Primeiru-Ministru, Xanana Gusmão, iha ne’ebé konsege troka opiniaun oinsá esforsu hamutuk atu harii momentu bá hametin relasaun bilaterál.
Nia rekoñese katak Timor-Leste ne’ebé lokaliza iha rota marítima importante liga Oseanu Índiku no Oseanu Pasífiku, ho ninia importánsia aumenta bá beibeik iha komunidade internasionál atuál, no nia temi ona katak, hakarak hametin relasaun ho Timor-Leste.
Durante estadia iha Timor-Leste, Ikuina Akiko sei hasoru-malu ho Prezidente Repúblika (PR), José Ramos-Horta no mós Ministru Negósiu Estranjeiru no Kooperasaun, Bendito dos Santos Freitas, sei konfirma atu hametin relasaun bilaterál no kooperasaun iha asuntu rejionál no internasionál sira.Sei ko’alia kona-bá asuntu rejionál no internasionál atu mantein no hametin órden internasionál ne’ebé livre no nakloke bazeia bá Estadu Direitu.Atu hatán bá kestaun sira-ne’e, parte rua konsege konfirma katak Japaun ho Timor-Leste sei servisu hamutuk atu fahe valór no prinsípiu fundamentál sira.
Ohin mós sei asina Memorandu Entendimentu ida kona-bá Projetu bá Bolsa Estudu Dezenvolvimentu Rekursu Umanu (JDS).Japaun iha intensaun atu halo progresu ne’ebé metin hodi apoia dezenvolvimentu rekursu umanu bá futuru Timor-Leste nian(*/Smnews)
Komentariu