Smnewstl.com —Timor-Leste no Illa Salomon koonkorda formaliza akordu kooperasaun iha área mina, jestaun rekurusus naturais no àrea estratejiku seluk.
Projetu estratéjiku ba kooperasaun ne’e hanesan assuntu importante iha enkontru entre Primeiru Ministru Illas Salomon, Jeremiah Manele, ho Ministru Petróleu no Rekursus Minerais, Francisco da Costa Monteiro ne’ebé halo vizita traballu iha Illa Salomon hamutuk ho delegasaun husi g7+.
Ba Primeiru Ministru Illa Salomon, presiza formaliza akordu ho Timor-Leste, liu-husi estabelesimentu Memorandu Entendimentu ida iha futuru, hodi loke dalan ba kooperasaun estratéjika no fahe esperiénsia ba malu.
Relasiona ho disponibilidade husi Xefe Governu Illa Salomon, Ministru Petróleu no Rekursus Minierais, Francisco da Costa Monteiro promete atu hatutan ba Primeiru Ministru Kay Rala Xanana Gusmão no aprezenta iha Konsellu Ministru atu konsidera, liu-liu kooperasaun iha minas no jestaun rekursus naturais ne’ebé sei sai hanesan baze kooperasaun entre nasaun rua.
Iha Illas Salomon, Ministru Petróleu no Rekursus Minerais ho Sekretáriu Jerál g7+,Helder da Costa, inklui lideransa husi TL-EITI, ANM, I.P. no IGTL, I.P., partisipa iha komemorasaun loron Independénsia Illas Salomon ba dala 47 iha loron 7 fulan Jullu, hodi reafirma interesse atu estabelese kooperasaun iha domíniu oi-oin.
Iha enkontru ho Ministru Negósius Estranjeirus no Komérsiu Externu husi Illas Salomon, Peter Shanel Agovaka no Ministru Minas, Enerjia no Elektrifikasaun Rural Derrick Rawcliff Manuari, Timor-Leste aprezenta inisiativa kooperasaun iha jestaun rekursus naturais iha kuadru nasaun frájil ho nasaun frájil ka fragile-to-fragile cooperation iha g7+.
Durante aprezentasaun iha semináriu ho tema, haforsa Parseria Rejionál liu-husi Aprezendisajen no Fahe Expriensia kona-ba Jestaun Rekursus Naturais, Ministru Francisco da Costa Monteiro subliña importánsia husi jestaun rekursus naturais no destaka esperiénsia Timor-Leste nian iha kriasaun kaudru legál no instituisionál, hodi asegura transparénsia, partisipasaun, no benefísiu tempu naruk husi rekursus naturais.
Ba governu Timor-Leste, kooperasaun ho Illas Salomon marka pasu signifikativu, atu fornese plataforma valioza ba partila konhesimentu no eksplora dalan kolaborativu atu hadi’ak governasaun rekursus iha ekonomia frájil no tranzisaun. (*/Smnews)
Komentariu