Smnewstl.com – Timor-Leste (TL) ho Repúblika Indonézia (RI) sei diskute asuntu Fronteira Marítima iha tempu badak nia laran.Primeiru-Ministru (PM), Kay Rala Xanana Gusmão fó-sai asuntu ne’e iha ámbitu lansamentu projetu Sísmiku ka Lansamentu bá Café 2D Seismic Acquisition PSC TL-OT-21-17 ho objetivu atu hahú halo levantamentu bá riku-soin Timor-Leste (TL) nian hanesan mina no gás iha rai-okos, iha parte Kosta Súl área bloku Pualaca no fatin sira seluk tán, iha salaun Parokiál Natarbora, sábadu (11/01/2025) ne’ebé organiza hosi TIMOR GAP, E.P, servisu hamutuk ho ANP.
“La lembra, karik iha fulan fevereiru ita komesa ona diskute ita-nia fronteira marítima ho Indonézia,” Primeiru-Ministru hateten.
Xanana Gusmão sita objetivu dahuluk hosi diskusaun bá fronteira maritima ne’e maka, atu defende soberania rai laran, nune‘e ró illegál sira labele mai hasai hotu ikan sira iha tasi Timor nian.
Tanba ne’e, Xefe Governu la promete maibé sei haree posibilidade atu fó-hanoin malu katak, iha Beaço-Viqueque sei koloka Forsa Navál hosi FALINTIL Forsa Defeza Timor-Leste (F-FDTL) nian atu evita peska illegál ne‘ebé hasai ikan barak, estraga buat barak.
Xanana Gusmão konta katak, peska illegál iha Tasi Timor nian mosu ona desde funu laran no funu na‘in sira detekta ona iha tempu ne’ebá.
“Bainhira ami la‘o hosi tasi ibun, ami hetan de‘it mak foer tanba ikan kiik barak mak mate kauza hosi peska illegál. Tanba sira hili de’it mak ikan bot atu bá fa’an no ikan kiik sira oho tiha no soe estraga mate hotu,” Xanana Gusmão konta.
Tuir Xefe Gvernu, tenke monta duni Forsa Navál atu bele kontrola no proteje soberania Timor-Leste nian nune’e ema seluk labele estraga riku soin iha tasi laran.
Soberania ne’e katak, Timor-Leste iha kbiit rasik atu esplora no kontrola ninia rikusoin rasik la‘ós de‘it iha rai maran maibé mós iha tasi laran.
Nee duni, husu nafatin bá Xefe suku no lia-na‘in sira tenke ko‘alia nafatin husu bá bei-ala sira atu ajuda nafatin nune’e prosesu diskusaun ne’e bele la’o ho sussesu. (*/Smnews)
Komentariu