Smnewstl.com – Primeiru-Ministru (PM), Kay Rala Xanana Gusmão kontinua atualiza bá Prezidente Repúblika (PR), José Ramos-Horta, kona-bá progresu preparasaun vizita Papa Francisco no mós komemorasaun loron konsulta populár 30 Agostu.
Atualizasaun ne’e liu hosi enkontru semanál entre Xefe Governu ho Xefe Estadu iha Palásiu Prezidensiál Bairru-Pité, kinta (18/07/2024).
Hafoin enkontru, Primeiru-Ministru hateten, Timor-Leste hanesan illa ida ne’ebé dook tebtetbes hosi Europa, tanba ne’e konsidera hanesan ondra boot tebes atu hetan vizita hosi Sua Santidade Papa Francisco, nune’e komisaun organizadora kontinua halo preparasaun másimu atu bele simu bainaka importante ida-ne’e.
“Ita-nia rai ne’e kiik no dook tebtebes. Tanba ne’e, hanesan ondra boot ida Papa Francisco bele mai vizita ita iha setembru. Presiza halo preparasaun no preparasaun la’o daudaun,” Xanana Gusmão hateten.
Atualiza mós kona-bá preparasaun hodi komemora eventu istóriku 30 Agostu hanesan loron konsulta populár ne’ebé sei marka prezensa hosi Sekretáriu Jerál Organizasaun Nasaun Unidas (ONU), António Guterres no eis xefe misaun Nasaun Unidas iha Timor Leste (UNAMET) Ian Martin.
Iha komemorasaun ne’e atu hanoin hikas sakrifísiu, sofrimentu no determinasaun povu Timor-Leste nian ne’ebé halo rai ne’e hetan ninia ukun rasik an.
“Ami na’in-rua Prezidente Repúblika ko’alia bá malu oinsá koordena didi’ak bá eventu boot rua ne’e bele la’o ho di’ak no susesu,” Xefe Governu hateten.
Xanana Gusmão ho Ramos-Horta mós iha esperansa katak, povu tomak sei sente kontente tanba iha 30 Agostu povu rasik sei selebra ninia askrifísiu no determinasaun.
Ikus-liu informa bá Prezidente Republika katak, Governu iha ona ninia jornada orsamentál no Xefe Ezekutivu fó ona orientasaun bá instituisaun hotu-hotu atu prepara planu no orsamentu bá tinan 2025.
Antes ne’e, Arsebispu Arkedioseze Metropolitana Díli, Dom Virgílio Kardeál do Carmo da Silva, SDB atualiza mós katak, Igreja Katólika Timor-Leste nia preparasaun bá simu Papa Francisco atinje ona 80% no hetan ona aprovasaun finál hosi Vatikanu.
Nune’e mós Ministru Administrasaun Estatal, Tomas do Rosário Cabral, hanesan Vise Koordenadór Jerál altu nível institusionál vizita Papa Francisco, antes ne’e atualiza ona progresu preparasaun fíziku bá Parlamentu Nasionál (PN) katak, atinje ona 80%. (*/Smmews)
Komentariu