Smnewstl.com – Fundasaun Neon Metin ho Universidade da Paz (UNPAZ) hari tan edifísiu foun rua no tau naran Kay Rala Xanana.
Edifísiu rua ne’e, ida maka Centro Estudo Estrategico da Paz (CEE-PAZ) no ida seluk maka edifísiu Kay Rala Building 1, ne’ebé lokaliza iha aredór UNPAZ, Osindo 1, Manleuana, Díli.
Primeiru-Ministru (PM), Kay Rala Xanana Gusmão mak hatuur fatuk dahuluk bá edifísiu rua ne’e iha sesta (12/07/2024).
“Pesoalmente ha’u orgullu no agradese tebtebes bá ita-bo’ot sira-nia konfiansa atu tau hela naran bá buat sira hanesan ne’e. Naran ne’ebé tau la’ós atu fó valór ba ha’u maibé fó valór bá ideia no buat ne’ebé lori ita bo’ot sira-nia persisténsia no konsisténsia. Buat rua ne’e monta karákter timor-oan nian. Persisténsia labele deziste iha dalan klaran, la’o nafatin, bele susar oinsá mós rezolve tiha hodi hakat bá rezolve fali problema seluk,” Primeiru-Ministru agradese.
Primeiru-Ministru mós husu bá responsável UNPAZ no Fundasaun Neon Metin atu konstrui salaun ida hodi utiliza bá konferénsia kona-bá paz.
“Husu tanba Universidade da Paz la’ós atu halo funu. Entaun, tenke iha salaun ida ne’ebé bele utiliza bá konferénsia paz nian,” Xanana husu.
Iha fatin hanesan, reitór UNPAZ, Adolmando Amaral agradese bá Primeiru-Ministru, Kay Rala Xanana Gusmão ne’ebé autoriza Fundasaun Neon Metin ho UNPAZ hodi bele utiliza naran Kay Rala Xanana iha edifísiu rua ne’e.
Razaun UNPAZ ho Fundasaun deside utiliza naran ne’e tanba Xanana hahú kedan ninia vida joven nian to’o idade ona sei hakarak nafatin atu investe tempu no enerjia hodi haree povu-nia moris no dezenvolvimentu nasaun ne’e nian.
“Ida-ne’e mak razaun ami hakarak uza naran ne’e bá edifísiu rua ne’e, atu bele transforma mentalidade estudante sira nian hanesan kontinuadór bá luta na’in sira-nia mehi iha tempu oin-mai,” reitór ne’e esplika.
Naran Kay Rala Xanana ne’e mós UNPAZ hakarak atu motiva dosente no timoroan sira ne’ebé estuda hela iha ne’e maski la hanesan ho saida mak Xanana Gusmão halo, maibé tenke la’o tuir dalan ne’ebé nia hatudu hodi halo netik buat ruma bá povu no nasaun nune’e bele realiza mehi erói sira-nian.
Prezidente Fundasaun Neon Metin, José Menezes hateten, edifísiu rua ne’e tau naran Kay Rala Xanana tanba presiza prezerva no promove iha espasu públiku, nune’e jerasaun foun sira bele hatene no banati tuir saida mak líder nasionál ne’e halo liu-hosi sakrifika-an bá rai ida-ne’e.
Edifísiu rua ne’e, ida ho naran Kay Rala Building 1 ho andar haat sei gasta $700.000 no seluk andar hitu ho orsamentu hanesan no konstrusaun ne’e responsabiliza hosi empreza Xineza, tuir planu sei remata iha dezembru tinan 2025.
Partisipa iha lansamentu ne’e Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitáriu, Mariano Asanami Sabino, membru-Governu balun, korpu dosente sira no estudante UNPAZ. (*/Smnews)
Komentariu