Smnewstl.com – Prezidente Parlamentu Nasionál (PPN), Maria Fernanda Lay fó pose bá Komisáriu Comissão Anti Corrupção (CAC) eleitu Rui Perreira no asiste direta hosi Primeiru-Ministru (PM), Kay Rala Xanana Gusmão ne’ebé husu atu servisu tau aas interese Estadu.
Primeiru-Ministru husu atu tau konsiderasaun bá kazu sira ne’ebé pendente no hetan atensaun públiku, tenke tau prioridade atu finaliza investigasaun.
“Tenke servisu didi’ak no tau aas interese Estadu nian,” Primeiru-Ministru husu bá Komisáriu Rui Pereira, iha sala konferénsia PN, sesta (05/07/2024).
Prezidente PN, Maria Fernanda Lay konsidera serimónia pose ne’e hodi hatudu realmente fiar Governu nian, Parlamentu Nasionál delibera ona ho maioria absoluta.
“Aktu ohin ne’e hodi formaliza ofisialmente tomada de pose ho prezensa Primeiru-Ministru, atu hatudu bá públiku katak, Governu ho Parlamentu no Estadu tomak iha nesesidade atu hatuur duni Komisáriu CAC hodi bele tuir saida mak ema hotu hein,” Fernanda Lay hateten.
Komisáriu Rui Pereira iha diskursu, kompromete sei tau konsiderasaun bá kazu pendente sira ne’ebé hetan atensaun públiku no sei tau prioridade atu finaliza investigasaun.
“CAC la lori ema bá komarka, maibé iha podér atu halo investigasaun. CAC ninia parseiru servisu maka Ministériu Públiku. Kazu sira ne’e, sei bá hotu Ministériu Públiku depois sei halo akuzasaun hodi lori bá Tribunál,” Komisáriu Rui Pereira hateten.
Durante mandatu tinan haat, Rui Pereira sei servisu hamutuk ho Ministériu Públiku (MP), Tribunál Rekursu (TR) no Ministériu Justisa (MJ) atu fó kapasitasaun bá investigadór sira.
Nu’udár Komisáriu CAC, Rui Pereira sei la halo perseguisaun polítika, bainhira iha ema ne’ebé komete korrupsaun no iha duni prova maka tenke lori bá oin no sei la rona informasaun hosi kualkér entidade liu-liu informasaun sira espalla iha mídia sosiál.
Komisáriu ne’e iha esperiénsia profisionál nu’udár advogadu desde tinan 1996, hosi tinan 2000 to’o 2005 nu’udár juís iha Tribunál Díli, hola parte iha Komisaun Verdade no Amizade, nu’udár asesór iha instituisaun Estadu, tinan 2010-2014 nu’udár adjuntu PDHJ no 2016-2018 nu’udár adjuntu Komisáriu CAC.
Rui Pereira hanesan kandidatu úniku ne’ebé eleitu ho votus maioria (41) hosi eleisaun iha Parlamentu Nasionál (PN) iha loron 24 fulan Juñu, bá períudu tinan 2024-2028.
Sasin bá serimónia pose ne’e maka Padre Ângelo Salsinha, Ministru Justisa (MJ), Sérgio da Costa Hornai, Vise-Ministru Asuntu Parlamentár, Adérito Hugo da Costa no membru Parlamentu Nasionál. (*/Smnews)
Komentariu