Smnewstl.com – Ministériu Edukasaun hakarak instala ekipamentu elektróniku iha eskola sira, hodi fasilita nesesidade ba realizasaun enkontru virtual “Zoom” entre estudante iha Timor-Leste no diaspora.
Informasaun ne’e relata husi Ministra Edukasaun, hafoin realiza enkontru ho estudante sira husi eskola Katólika Xavier Australia, ne’ebé durante ne’e hala’o sira nia vizita ba iha eskola sira iha Letefoho no Turiskai hodi fahe esperénsia ba malu liuhusi lian ingles.
Tuir Ministra, eskola amiga ho Timor-Leste, hetan esperénsia iha Turiskai ne’ebé liuhusi via zoom sira mós hanoin katak iha futuru bele realiza mós iha eskola Letefoho.
“Ita presiza instala ekipamentu iha eskola sira atu iha programa zoom ne’e sira bele prátika entre estudante sira husi Australia no Timor-Leste, nune’e mós iha futuru atu lori estudante timoroan sira ba vizita eskola Katólika Xavier Australia”, dehan Ministra.
Governante ne’e hatutan, zoom meeting ne’e nia vantajen mak estudante sira bele kontinua dezenvolve sira nia koñesimentu iha lian inglés, tanba sira ko’alia inglés ba malu entre estudante iha timor no Australia, liuhusi esforsu ida ne’e mak sira bele prátika di’ak liu tan lian inglés.
Enkuantu estudante sira husi eskola Katólika Xavier Australia hamutuk na’in sanulu resin tolu (13) inklui mane na’in haat (4) no feto hamutuk na’in tolu (3) akompaña husi profesora na’in tolu (3).(Smnews)
Komentariu