Smnewstl.com – Ministru Petróleu no Rekursu Minerais, Francisco da Costa Monteiro deklara iha Abu Dhabi, Emirados Arabes Unidos, nesesidade atu dezenvolve seitór petróleo, hodi ajuda ekonomia Timor-Leste nian.
Pozisaun ne’e aprezenta durante partisipa iha Expozisaun no Konferénsia Internasionál ba Petróleu iha Abu Dhabi (ADIPEC – Sigla iha Inglez) ne’ebé realiza husi loron 2 to’o 5 fulan Outubru iha Emirados Arabes Unidos.
Governante ne’e hetan konvite husi Ministru Enerjia no Infraestruturas husi Emirados Arabes Unidos nian, Suhail Mohamed Al Mouzrouei, hodi partisipa iha evento ne’ebé patrosina husi Prezidente Emirados Arabes Unidos nian, Sheik Mohammed Bin Zayed Al Nahyan.
Ministru Francisco Monteiro subliña importánsia ba rekoñesimentu gás natural hanesan parte ida husi tranzisaun enerjétika krusiál, tanba emisaun karbonu ki’ik liu no ba Timor-Leste, presiza duni esplora, dezenvolve nafatin gás natural atu nune’e bele kontribui konsideravelmente ba nesesidade ajustamentu ritmu relasiona ba konstrusaun sósiu ekonómiku kada nasaun nian.
Membru governu ne’e mos partisipa iha forúm altu nível, diskussaun meza redonda no atende enkontru nível ministros husi rejiaun Ázia, Europa, Áfrika no Amérika Súl no Norte liu sanulu. Além ne’e, marka mos presenza husi Xefe husi Organizasaun Internasionál sira, Inklui husi OPEC, hodi partisipa iha diskussaun kona-ba regra husi Chatam House “regra ne’ebé regula katak, participante husi reuniaun bele uza informasaun ne’ebé mak nia hetan iha reuniaun ne’e, maibé labele lekar ba ema seluk ne’ebé mak komenta”.
Prezidente Designadu ba COP28 (Konferénsia Nasoes Unidas kona-ba Mudansa Klimátika) no Ministru ba Indústria no Teknoloijia Avansada, husi Emiados Arabes Unidus, Sultan Ahmed Al jaber deklara iha konferénsia, importánsia hodi buka solusaun ba indústria petrolífera no fiar katak, evento ne’e sai meius ba arranju ba solusaun, hodi dezenvolve gás natural.(smnews)
Komentariu