Smnewstl.com 22-02-2022 (Likisá) — Apoiante suku 9 iha postu administrativu Bazartete Munisípiu Likisá, deklara fó apoiu tomak bá kandidatu Prezidente Repúblika (PR) ho númeru sorteiu 8, Tenente Jenerál Reformadu Lere Anan Timur atu sai PR periódu 2022-2022.
Koordenadór Ekipa Susesu Munisípiu Likisá, Iku Jerónimo deklara, sei mobiliza Likisá oan sira hamrik firme iha kandidatura Tenente Jenerál Reformadu, Lere Anan Timur nia sorin atu fó vitória bá iha eleisaun prezidensiál 19 Marsu fulan oin.
“Ami iha ne’e joven hotu de’it, mas ami hanoin katak, ami-nia katuas sira, ami-nia veteranus sira, juventude rezisténsia sira iha ne’e sei la husik ami, maske sira iha kandidatura sira seluk, maibé sira-nia fuan iha ita-boot, tanba sira kuiñese ita-boot didikasaun bá rai ida-ne’e nia independénsia,” dehan Koordenadór Ekipa Susesu, Iku Jerónimo, bainhira simu kandidatura Lere Anan Timur iha ámbitu konsolidasaun iha Pilila Bazartete Munisípiu Likisá, Tersa ne’e.
Iku Jerónimo hatutan, rajaun sira apoiu Jenerál Lere Anan Timur bá PR la’ós atu buka lúkru, maibé atu hatudu sira-nia prontidaun hanesan Timoroan atu fó apoiu bá asu-wa’in sira seluk.
Tanba tuir nia katak, iha tinan hira bá kotuk, sira fó ona konfiansa bá Kay Xanana Gusmão, José Ramos-Horta, Taur Matan Ruak no Francisco Guterres Lú-olo hodi PR, tan ne’e, 2022-20227 tenki fó fali konfiansa bá líder nasionál Lere Anan Timur.
Fatin hanesan, Kandidatu PR, Tenente Jenerál Reformadu Lere Anan Timur hatete, rajaun sai husi Xefe Estadu Maiór Jenerál Forsas Armandas hodi kandidata aan bá PR, tanba hakarak sai PR ne’ebé diferente ho PR sira uluk ona.
“
Ha’u tenki husik ha’u-nia knár nu’udar XEMJFA hakarak hili dalan Prezidente Repúblika, haree katak ha’u hakarak halo diferensia ho ha’u-nia maluk sira seluk ne’ebé ukun tiha ona,” dehan Kandidatu PR, Lere Anan Timur.
Lere subliña, Prezidente Repúblika mak tenki kumpre uluk konstituisaun RDTL, maibé la’ós atu obriga ema seluk de’it mak tenki kumpre bá konstituisaun, tanba PR nu’udar defensór atu hakruk de’it bá konstituisaun RDTL.
“Prezidente Repúblika mak tenki kumpre uluk konstituisaun (RDTL), labele nia la kumpre tiha haruka ema mak kumpre, o halo desizaun ruma mós tenki bazeia bá ita-nia konstituisaun, ita-nia konstituisaun mak ita-nia klamar, ita-nia konstituisaun mak ita-nia ra’an, konstituisaun laiha ita klamar laiha,” subliña nia.
Eis Xefe Estadu Maiór Jenerál Forsas Armandas ne’e realsa, dever PR nian mak hanesan símbolu unidade nasionál, tanba ne’e sei reprezenta soberania unidade nasionál.
Nune’e, labele sai opozisaun bá órgaun soberania seluk, instituisaun estadu no mós líder nasionál sira seluk.
Partisipa iha atividade konsolidasaun ne’e, veterana Kasian no veteranu sira seluk, Juventude rezisténsia, apoiantes husi suku 9 no seluk tan.(ant)
Komentariu