Smnewstl.com 11-02-2022 (Dili) — Vise-Ministru Interior (MI) António Armindo hateten, finaliza ona estatutu pessoál bá membru Polísia Nasionál Timor-Leste (PNTL) ne’ebé idade avansadu atu reforma.
António Armindo hatutan, maske estatutu pessoál finaliza ona, maibé seidauk bele aprezenta bá Konsellu Ministru atu halo aprovasuan, tanba presiza integrasaun pareser legál husi seguransa sosiál, nune’e bele garante nafatin direitu PNTL ne’ebé sei reforma.
“Sira-nia estatutu pessoál finál ona, agora ita halo intregrasaun pareser legál husi seguransa sosiál ninian ne’ebé mak haruka mai ona, entaun ita bele akomoda sira-nia parsel sira-ne’e, ne’e mak ita lori fali bá PCM, seidauk aprova tanba sei halo revizaun hela no sei akomoda hela pareser legál sira husi seguransa sosiál ninian,” dehan Vise MI nia, António, iha knár fatin MI vila verde, Sesta ne’e.
Vise-Ministru Interiór ne’e orienta ona asesor legál sira atu aselera prosesu ne’e, nune’e bele aprezenta no hetan aprovasuan iha Konsellu Ministru.
“Mais ita espera, hau koalia ona asesor sira para, bele tenke halo lalais para pelu menus semana-oin no semana oin tan bele akontese iha konsellu Ministru,” tenik nia.
Fatin hanesan, Komandante Jerál PNTL, Komisáriu Faustino da Costa hateten, Komandu PNTL entrega ona esbosu estatutu kona-ba reforma bá membru ne’ebé idade avansadu atu reforma ne’e iha ona Ministériu Interiór, tanba ne’e kompeténsia governu nian halo desizaun polítika.
“Estatutu tantu ami-nia orgánika ne’e aprezenta ona ba governu, ne’ebe ida-ne’e la’ós kompeténsia Polísia nian ona, dala ida tan katak tantu orgánika ka estatutu ne’e iha ona governu nia liman,” subliña nia.
Bainhira iha estatutu pessoál klaru, maka Komandu PNTL sei aplika iha internal PNTL nian.(ant)
Komentariu