Smnewstl.com 28-01-2022 (Dili) — Prezidente Repúblika (PR), Francisco Guterres Lú-olo Sesta-feira ne’e, ezonera ona Lere Anan Timur husi kargu nu’udar Xefe Estadu Maiór Jenerál FALINTIL Forsa Defeza Timor-Leste (F-FDTL).
Governu liu husi reuniaun Konsellu Ministru iha loron 21 fulan Janeiru 2022, aprova proposta reforma Tenente Jenerál Lere Anan Timur nian, ne’ebé aprezenta husi Ministru Defeza, Filomeno Paixão.
Hafoin aprova, governu haruka proposta ne’e bá Prezidente Repúblika, nu’udar Komandante Supremu Forsas Armandas nian nune’e, iha loron 27 fulan Janeiru 2022, konvoka kedas enkontru Konsellu Superiór Defeza no Seguransa hodi rona hanoin molok deside.
Hafoin rona hanoin, tuir kedas iha loron 28 fulan Janeiru 2022, Prezidente Repúblika, Francisco Guterres Lú-olo uza kompeténsia nu’udar Komandante Supremu Forsas Armandas nian, ezonera ona Xefe Estadu Maiór Jenerál F-FDTL, Tenente Jenerál, Lere Anan Timur hodi fila ba vida sivil.
Ba desizaun ne’e, tuir informasasun ne’ebe Smnews asesu husi ekipa susesu komfirma, preparado ona hodi lori Lere Anan Timur ba kompete iha eleisaun Presidensial, ne’ebe sei halao iha fulan Marco 2022.
“Efetivu ne’e falta deit loron balun, tan ne’e ho esturutura ne’ebe iha ona, ami halao servisu ho liafuan bahasa karik dehan pemantapan hodi haka’at ba batalha,”informa Hugo Fernandes, Kordenador Jeral ekipa kandidatura Lere Anan Timur.
Nia hatutan, ekipa preparadu ona nune’e semana oin bele submete ona lista kandidatura ba Tribunal Recurso ho total apoiantes rihun rua nulu tuir dadus ne’ebe provisorio iha ona. (Ant)
Komentariu