Smnewstl.com 17-01-2022 (Dili) — Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur deklara, nia parte hatama ona karta bá Ministru Defeza, Filomeno Paixão atu reforma husi instituisaun F-FDTL no kandidata bá Prezidente Repúblika.
Ligado ho karta refere, Lere Anan afirma, bainhira laiha impedimentu polítika ruma maka nia prontu atu asume responsabilidade todan hanesan aman ba nasaun nomos Komandante Supremu Forsas Armandas nian.
“Imi dalaruma rona katak, ha’u atu Kandidata bá Prezidente, ne’e última karreira bá ema ida, mais por a kazu sé laiha impedimentu, laiha manobra polítika ha’u bele sai Kandidatu bá Prezidente atu sai imi-nia komandante Supremu das Forsas Armadas,”deklara Tenente Jenerál Lere Anan Timur, iha nia diskursu ikus Selebrasaun Aniversáriu Unidade Polísia Militár bá dala 17, iha kuartel PM Quintal Boot, Dili, Segunda ne’e.
Lere fi’ar katak, atuál Prezidente Repúblika, Francisco Guterres Lú-olo sei la impede ninia karta reforma ne’ebé hatama ona, tanba sira iha komprimísiu iha laran.
“Porque agora hotu-hotu iha interese polítiku boikota malu buat sira-ne’e hotu, mais ha’u hanoin katak, ha’u-nia Lú Prezidente Repúblika, ami na’in-rua ne’e ema seluk ema le’et, ami-rua mesak maun alin. Ami uluk kompromete ami jura katak, ita na’in-rua mate hamutuk, ita na’in-rua terus hamutuk ita prontu ona,” afirma Lere.
Lere subliña, bainhira nia kandidatu aan bá Prezidente Repúblika, maka taka ona dalan bá jerasaun rua sira, tanba atuál Prezidente Repúblika, Francisco Guterres Lú-olo hetan ona titulár tolu hanesan, Prezidente Asembleia Konstituinte mai Prezidente Parlamentu Nasionál, no mós Prezidente Repúblika.
Lere afirma, dadauk ne’e, nia hetan ona forsa polítika liu husi povu la’ós de’it husi partidu, atu kandidata aan bá Prezidente Repúblika. “Ha’u hatete katak, ha’u kandidata ha’u-nia aan, ha’u lori veteranus rezisténsia tomak nia naran, ha’u kandidata ha’u-nian aan ha’u FRETILIN,” dehan Lere ho lian a’as.
Tenente Jenerál ne’e fundamenta, agora nia seidauk bele deklara bá públiku kona-ba ninia kandidatura, tanba seidauk tempu.(ant)
Komentariu