Smnewstl.com 01-01-2022 (Liquica) – Asaltu tiru hosi Grupu Juventude hosi Aldea Kabu Lima, Suku Dato, Postu Administrativu Liquiça Vila, Munisipiu Liquiça rezulta vitima na’in lima (5) hosi Aldeia Hekar sofre kanek tanba hetan tiru ho kilat manu (Senapan Angin).
Kazu asaltu tiru ne’e akontese derepente iha oras tuku 9:00 ho balun dader ne’e, bainhira grupu juventude balun hosi Aldea Kabu Lima ne’ebé diskumfia lanu baku uluk joventude na’in rua hosi Aldeia Hekar ne’ebé halo viazen ho transporte.
Suspeitu sira hapara joven rua ne’e hodi baku kanek ho razaun ne’ebé la klaru. La simu ho asaun baku ne’e, familia vitima hakat kedas ba suspeitu sira nia uma hodi husu klarifikasaun, nune’e ikus mai grupu juventude balun foti kilat manu ne’ebé rai subar iha uma laran hodi tiru hasoru hakanek joven no katuas balun.
Tuir sasin António Lobato Pereira hosi Aldeia Kabu Lima informa asaun tiru ne’e ho kilat manu ne’e rezulta joven balun ne’ebé kanek hanesan, Henrique, Zacarias, Albino no joven balun tan hetan tiru iha kotuk laran no kabun.
“Vitima na’in lima maka kanek todan, tanba grupu joven sira ne’e lanu foti kilat manu maka tiru hasoru vitma sira, no dadaun ne’e vitima ida kanek todan sira lori ona ba opsitál Liquiça,” dehan António ba Smnews via telefone.
António klarifika, problema ne’e nia hun kauza hosi problema entre grupu joventu hemu tua lanu maka baku ema arbiru iha dalan.
“Grupu Alde Aldeia Kabu-Lima hemu tua lanu selebra tinan foun 2022, derepente sira baku hasoru alin joven ida too raan sai makas, tanba ne’e familia vitima sira suspeitu sira nia uma atu husu klarifikasaun, ikus mai mosu tiru derrepente,” nia hatete.
Hafoin akontesimentu, parte intelejensia F-FDTL no Servisu Informasaun Polisia (SIP) too kedas iha fatin akontesimentu hodi hakalma situasaun inklui koordena ho Komandu PNTL Liquiça halo ona investigasaun iha terrenu no buka tuir paradeiru suspeitu sira nian.
Komandante PNTL Municipio Liquica, Superintendente Umbelina Soares dos Santos rekuinese problema refere no informa katak, ema nain lima mak sofre kanek, no nain rua mak transporta ona mai Hosipital Nacional Gudi Valadares Dili. Enkuanto suspeitu sei kontinua identifika hela hafoin bele fo sai.
Aliende ne’e, Portavós Komandu Jerál PNTL, Superintendente Xefe, Arnaldo de Araújo informa, Komandu PNTL Liquiça hetan apoiu hosi Unidade Polisia Espesiál (UPE), Bataliaun Orden Públiku (BOP) halo ona intervensaun iha terenu. (rio)
Komentariu