Smnewestl.com 13-12-21 (Dili) — Polísia Nasionál Timor-Leste (PNTL) ho FALINTIL Forsa Defeza Timor-Leste (F-FDTL) ‘futu-lia’ hamutuk hodi halo operasaun konjunta bá membru sira no mós situasuan jerál durante selebrasaun festa natál no tinan foun.
Xefe Departamentu Justisa PNTL, Superintendente Xefe Agostinho Gomes hateten, hahú ohin bá oin, Profos PNTL ho Polísia Militár F-FDTL lansa operasaun disiplina konjunta ne’ebé hanaran ‘Haberan’ ho objetivu atu garante orden disiplina no aplikasaun lei di’ak liután.
“Departamentu Justisa PNTL no Polísia Militár F-FDTL hahú ohin lansa operasaun disiplina konjunta ho kódiku operasaun Haberan, nia objetivu ne’e atu garantia disiplina orden no aplikasaun lei, normál no orden Komandu, ne’e hala’o par atu bele reforsa, la signfika katak, durante ne’e forsa laiha disiplina, forsa iha disiplina mak rejiste to’o agora servi estadu ho povu,” dehan Superintendente Xefe Agostinho Gomes, iha Kuartel PM Quintal Boot, Dili, Segunda ne’e.
Agostinho hatutan, operasaun konjunta ne’e nu’udar medidas prevensaun atu evita membru rua ne’e komete iha infrasaun durante festa natál ho tinan foun.
Nune’e, bele kria estabilidade no mós kria seguransa atu povu bele festeza natál no tinan foun ho hakmate.
Iha operasaun ne’e mak deteta membru sira utiliza arma Polisiál sem hetan autorizasaun husi komandu rua ne’e maka, sei foti kedas pistola ou kilat ne’e, no mós aplika tuir Regulamentu Disiplina Militár (RDM) F-FDTL nian, no mós Regulamentu Disiplina Polísia (RDP) PNTL nian.
“Fízikamente sei halo liu husi atividade patrullamentu konjunta, ou atividade chek point konjunta ho alvu ne’e haree ezemplu, bá PNTL de’it, atu hala’o viajen area asaun Polisiál ida bá área asaun Polísia seluk, obrigatoriamente lori giua da marsa, bazeia bá despaixu Komandante Jerál PNTL ne’ebé hasai iha Setembru 2021, inklui lori kilat ou arma de fogu espesialmente pistola laiha surat autorizasaun husi Komandu sei foti asaun,” dehan Agostinho.
Nia akresenta, operasaun ne’e hala’o mós, tanba iha referénsia iha pasadu hatudu, membru sira fila uma kontinua lori arma.
“Ho referénsia sira-ne’e mak ita halo operasaun ne’e, par atu kontrola, regula, bá sira-ne’ebé la kumpre foti asaun disiplinár ne’ebé firme hasoru sira,” tenik nia.
Komandante Interinu Polísia Militár, Kapitaun Francisco Xavier dos Reis Neto reforsa, liu husi operasaun konjunta ne’e, bainhira Polísia Militár deteta membru PNTL ruma lori pistola ne’ebé la hetan autorizasaun husi Komandu, maka sei komunika bá Komandu PNTL atu prosesa.
“Ne’e mak ami-nia servisu hamutuk ne’e, servisu hamutuk ne’e fízikamente hamutuk sei hamutuk sei haree saida mak Polísia ninian, sei kontaktu bá iha Profos par hamutuk prosesa,” dehan Kapitaun Francisco.
Entretantu, Operasaun konjunta Haberan ne’e, hahú dia 13 Dezembru 2021 to’o dia 3 Janeiru 2022. Ne’ebé sei hala’o liu-liu iha Munisípiu Dili no mós Munisípiu sira seluk.(ant)
Komentariu