Smnewestl.com (08-12-21) (Dili) — Primeiru-Ministru (PM), Taur Matan Ruak, eis Prezidente Repúblika (PR), José Ramos-Horta no Archebispu Arkidioseze Metropolitana Dili, Dom Virgílio do Carmo da Silva ofisialmente halo inaugurasaun no abertura bá Universidade Katólika Timorense (UCT).
Magnífiku Reitór Universidade Katólika Timorense (UCT), São João Paulo II, Joel Casimiro Pinto Ofom hateten, fulan fevereiru tinan oin 2022, UCT hahú loke inskrisaun foun bá estudante sira-ne’ebé hakarak eskola iha UCT.
Reitór UCT ne’e ne’e hatutan, rekrumantu bá estudante foun hahú iha tinan oin, tanba Fundasaun Arkidioseze ho Fundasaun São João Paulo II prepara planu estratéjiku UCT nian bá tempu naruk, nu’udar padraun ida atu bele la’o tuir.
“Ohin foin inaugurasaun no abertura bá Universidade Katólika katak, ofisialmente loke no Archebispu Dom Virgílio nomeia atan ha’u hanesan Magnífiku Reitór bá UCT, ami sei tur hamutuk fila-fali ho ekipa tomak hodi haree kona-ba planu estratéjiku liu-liu bá universidade UCT nian rasik, saida mak ami bele alkansa iha tinan 5 oin mai,” dehan Reitór UCT São João Paulo II, Padre Joel Casimiro, iha Balide, Dili, kuarta ne’e.
Tan ne´e Padre Joel hatutan, tinan oin 2022, hahú ona halo inskrisaun bá estante sira tuir kuota ne´ebé UCT presiza. Maibé, bá estudante foun sira, sei hahú ho pre-semester durante fulan 6 bá estudante sira atu bele aprende líaguan Inglés ho Portugués, hafoin hakat bá semester tuir mai.
“Ne’e tinan oin mak hahu ho inskrisaun bá alunus foun UCT nian iha 2022 sé ha’u la sala iha Fevereiru hanesan ne’e, depois estudante sira-ne’ebé mai, sira sei la direitamente hahú aula semester primeiru nian, aula ida pre-semestee fulan 6 sira sei oferese bá sira kursu Portugés, Inglés, tanba hotu-hotu tenki iha Inglés ou Portugés iha aula laran,” dehan Reitór UCT.
Sorin seluk, Archebispu Arkidioseze Metropolitana Dili, Dom Virgílio do Carmo da Silva hateten, planu harii UCT São João Paulo II ne’e desde 2002 ne’ebé inisia husi Bispu Dom Carlos Filipe Ximenes Belo SDB.
“Iha 2002 Dom Carlos mak mehi uluk, hahú ona forma ekipa amu lulik sira leigos sira atu hahú estuda kona-ba ida-ne’e, depois Dom Carlos sai tiha, ita-nia saudozu Dom Alberto taka fila-fali to’o 2010 sira komesa tau ona primeira pedra bá ofísius bá Reitór, Dekanu,” dehan Dom Virgílio do Carmo, iha UCT São João Paulo II Balide, Dili, kuarta ne’e.
No iha tinan 2021 ne’e, forma ekipa instaladora ne’ebé Xefia husi Padre Guilhermino da Silva hodi aproxima ho MESSK, tanba atu harii universidade tenki kumpre kadernu padraun universidade nian.
“Hahú servisu husi fulan Marsu, Abríl, Maiu, Jullu dokumentu hirak ne’e hotu prontu, iha dia 16 de Jullu festa nossa señora do Carmo ninian ami entrega dokumentu ne’e bá MESSK sira prosesa, Jullu, Agostu, Setembru, Outubru, Novembru no Dezembru semana kotuk mak hetan lisensiamentu,” hatutan Bispu.
Maski nune’e, Archebispu Arkidioseze Metropolitana Dili ne’e subliña, konstrusaun bá edifísiu UCT ne’e mós, hetan apoiu fundus transferénsia públika Governu nian, iha ámbitu akórdu entre Sante-sé Vatikanu ho governu Timor-Leste.
“Ne’eduni atu dehan loloos katak, subsídiu governu ninian ne’ebé fó bá igreja parte Dioseze Dili nian mak ami uza hodi reabilita ida-ne’e, tanba iha subsídiu ne’e mós dehan, 50% bá edukasaun, tanba ne’e mak ami aproveita 50% ne’e mak hodi reabilita hirak ne’e,” informa nia.
Archebispu mós nomeia ona Magnífiku Reitór UCT São João Paulo II Joel Casimiro, hamutuk ho estrutura hanesan Pro-reitores no Administradór Jerál.
Tan ne’e, tempu badak mós, Dioseze ho fundasaun São João Paulo II, prepara bá halo rekrutamentu bá dosentes ho estudante sira, inklui dekanu sira UCT nian, nune’e bele hahú ona prosesu aprendizajen normál.
Entretantu, UCT hetan lisensiamentu husi Governu liu husi Ministériu Ensinu Superiór, Siénsia no Kultura (MESSK) iha fakuldade ha’at mak hanesan, Fakuldade Siénsia Edukasaun, Arte no Kultura, Fakuldade Siénsia Umana, Fakuldade Siénsia Médikas no Fakuldade Enjiñaria Téknika Agríkola, no mós departamentu hamutuk 20.(ant)
Komentariu