Smnewestl.com (03-12-21) — Parlamentu Nasionál (PN) aprova ona proprosa lei no.35/V(4a) kona-ba Orsamentu Jerál Estadu (OJE) bá tinan 2022 ho montante billiaun 1,675 iha faze jeneralidade ho votus afavór 44 kontra zero no abstensaun 21.
Parlamentu Nasionál ho oitavu governu konstitusionál, debate OJE 2022 hala’o durante loron tolu, hahú iha loron 1 fulan Dezembru to’o loron 3 fulan Dezembru tinan 2021, tuir guiaun ne’ebé líderes bankada sira aprova ona.
Ho aprovasaun iha jeneralidade ne’e, Primeiru-Ministru (PM), Taur Matan Ruak, agradese bá Prezidente PN, Aniceto Gueterres ho deputadu sira-nia didikasaun no sakrifísiu hodi hariku no harame diskusaun OJE 2022 durante loron tolu ne’e.
“Hanesan Xefe Governu hakarak aproveita oportunidade ida-ne’e, hodi agradese bá señór Prezidente Parlamentu Nasionál, distíntas no distístu deputadu sira-nia didikasaun no sakrifísiu hodi hariku no harame diskusaun orsamentu tinan oin nian,” dehan PM Taur iha intervensaun hafoin aprova jeneralidade OJE 2022 iha plenária PN, sesta ne’e.
PM Taur hatutan, governu konsiente katak, prosesu hotu-hotu ne’ebé sei akontese iha Timor-Leste la’ós fásil, maibé atu akontese, bainhira iha kontribuisaun no apoiu husi ema hotu nian.
“Hanesan mudansa ne’ebé hala’o dadauk iha finansas públikas hodi hili modelu osamentu por programa no rezultadu, sei ajuda tebes ita uza ita-nia rekursu ho forma sustentável hodi benefisia ita-nia povu no nasaun iha tempu naruk oin-mai,” tenki PM.
Alem de ne’e, Xefe Governu reafirma katak, governu aponta preukupasaun hotu ne’ebé hato’o husi deputadu sira durante debate loron tolu, tan ne’e, promete atu kontinua hametin parseira entre governu ho PN, sosiedade sivíl no mós parseiru dezenvolvimentu sira.
Tanba PM Taur hatutan, hotu-hotu partilla preukupasaun hanesan liu-liu atu hametin páz no haburas dezenvolvimentu umanu hodi dudu kreximentu ekonómiku atu bele hadi’a padraun moris povu Timor nian.
“Diskusaun iha espesialidade sei tuir mai, governu promete atu kontinua fó kontribuisaun ne’ebé bele hodi akomoda preukupasoens no kontribuisaun sira hotu ne’ebé sei aprezenta durante diskusaun iha espesialidade to’o aprovasaun finál globál,” PM Taur dehan tan.
Sorin seluk, Prezidente PN, Aniceto Guterres hatete, tuir prosedimentu legál ne’ebé iha, PN sei halo diskusaun no aprovasaun finál globál OJE 2022 iha loron 6 fulan Dezembru tinan ida-ne’e, iha segunda-feira semana-oin.
Aniceto hatutan, meza PN mós simu ona proposta husi deputadu sira, tan ne’e, meza sei halo admisaun proposta refere, nune’e prepara bá diskusaun espesialidade.
“Tuir prosedimentu ita sei hakat bá diskusaun no aprovasaun iha espesialidade ne’ebé tuir kalendáriu ita sei hahú iha dia 6 de Dezembru 2021 segunda-feira, tanba proposta hotu tama ona, meza sei halo admisaun bá proposta no organiza proposta sira par prontu atu hahú diskusaun iha segunda-feira,” dehan Aniceto.(ant)
Komentariu