Smnewstl.com 02-12-2021 (Dili) – Eis Komandante Ein-Xefe das FALINTIL, Kay Rala Xanana Gusmão ho eis Prezidente Repúblika, José Ramos-Horta no mós Archebispu Arkidioseze Dili, Dom Virgílio do Carmo da Silva oferese fatin bá grupu Arte Moris hodi rai provizóriu Materiál Artístika ne’ebé autoridade seguransa so’e hela iha li’ur.
Fatin ne’ebé Kay Xanana Gusmão oferese mak Xanana Redding Room, José Ramos-Horta oferese nia rezidénsia iha Metiaut, enkuantu Arkidioseze Dili, Dom Virgílio do Carmo da mós oferese espasu balun iha Dioseze Dili.
Premiadu Nobel da Páz, José Ramos-Horta hateten, pessoalmente entrega ona espasu balun iha uma Metiaut bá Arte Moris hodi tau provizóriu sira-nia sasán ne’ebé daduak ne’e abandonadau hela iha areadores Arte Moris nian.
“Farol klot demais, iha Metiaut ha’u bele hamamuk fatin ida para sira tau temporáriu, mais sira mós hetan ona oferta husi Archebispu ho Avo Nana. Sasán sira-ne’e sei namkari, balun iha ha’u-nia uma, balun iha salaun Parokiál no balun iha Avo Nana nia uma,” dehan Eis PR, José Ramos-Horta, iha salaun Delta Nova, kinta ne’e.
Kona-ba hasai grupu Arte Moris afeita ba imagem Primeiru-Ministru (PM), Taur Matan Ruak, Horta sujere atu prepara uluk fatin foun ida bá Arte Moris, nune’e bele kontinua hala’o sira-nia atividade.
“Mais ne’e laiha buat ida temporáriu, ho kontroversial boot ne’e, halo fo’er Primeiru-Ministru nia naran rasik, pelu menus hanoin governu bele bok aan lalais hetan fatin foun ida bá Arte Moris,” dehan Horta.
Eis Xefe Estadu ne’e hatutan, governu gasta osan hamutuk rihun $ 130 inklui osan ne’ebé apoiu husi governu Dubai mínimu rihun $ 500 bá Expo Dubai, maibé laiha osan atu aluga fatin ruma bá veteranus inklui harii fali edifísiu ruma bá veteranus sira iha rai estadu ne’ebé abandonadu hela.
Tan ne’e Horta konsidera, governu haruka Polísia bá hasai sasán arte sira iha Arte Moris, governu laiha polítika, no hakarak estraga kredibilidade governu nian iha públiku.
“Haruka Polísia bá iha ne’ebá, hasai arte sira-ne’e governu ne’e nem hatudu hanoin oituan ké ne’e fó naran aat bá governu, governu la presiza halo nune’e, governu bee halo ne’e lahatene liu saida mak Polítika, nem iha sentimentu iha ga laiha, nem hatudu matenek tanba halo buat ida-ne’e, Timor nia naran, governu nia naran sai aat loos, hanesan fali rejime komunista sira mak sunu lívru destroi arte,” dehan Horta.
“Triste tanba ha’u respeita ita-nia Primeiru-Ministru, Taur Matan Ruak, nia ema ida di’ak, veteranus luta, sé mak foti desizaun ne’e, Primeiru-Ministru hatene ou sira halo konforme hakarak,” hatutan nia.
Horta husu grupu Arte Moris atu halo keixa bá Prokuradoria Jerál Repúblika no Tribunál hodi kontra asaun governu nian, nune’e bele iha responsabilidade no mós bele iha kompensasaun bá danus morais material grupu Arte Moris, tanba governu halo asaun krime kontra kontra arte.
Sorin seluk, Prezidente Asosiasaun Arte Moris, Iliwato Dana Bere hateten, Xanana Ridding Room ho salaun Parokiál mak konfirmadu ona atu akomoda Materiál Artístika Arte Moris nian.
“Iha konfirma klaru ona maka Xanana Ridding Room liu husi orientasaun Avo Nana nian mak prepara atu akomoda ami-nia sasán, primeiru mak Dioseze Dili liu husi Amu João mak mai rasik iha ne’e mós prepara hela par atu akomoda ami-nia obra balun, ikus liu Avo Ramos nia estatus sei nafatin ami-nia pelindung, nia hatete ami, ninia uma mós ami-nia uma,” dehan Iliwato.
Iliwato Dana Bere dehan, sira sei lori de’it Materiál ne’ebé konsidera importante liu mak sira sei salva no sei lori bá tau provizóriu iha Xanana Ridding Room, Salaun Parokiál no mós rezidénsia Ramos-Horta nian iha Metiaut.
Nia hatutan, Timor Plaza mós kontaktu ona sira no oferta mós espasu balun bá sira atu akomoda sasán sira-ne’e, maibé sei hein desizaun husi Avo Jape.
Entretantu, iha loron Kuarta-Feira (01-12-21) Sekretáriu Estadu Terras Propriedades no hetan apoiu husi Polísia Nasionál Timor-Leste (PNTL) no mós jestaun merkadu Munisípiu Dili, halo despezu administrativu bá edifísiu Arte Moris iha Betó, tanba fatin ne’e entrega ona Konsellu Kombatentes Libertasaun Nasionál (KKLN).(ant)
Komentariu