Smnewstl.com 09-11-2021 (Dili) – Polísia Sientífika Investigasaun Kriminál (PSIK), Tersa-feira ne’e ezekuta mandadu detensaun buska no apreensaun bá sidadaun na’in tolu iha kapitál Dili, tanba diskonfia komete iha krime falsifikasaun dokumentu iha instituisaun estadu balun.
PSIK ezekuta mandadu detensaun buska no apreensaun husi Tribunal Distritál Dili ho númeru NUC 00/21.PGGCC.
Adjundu Diretór PSIK, Adino Cabral dehan, PSIK halo apreensaun bá suspeitu na’in-tolu no rezidénsia ha’at iha kapitál Dili no detein ona suspeitu sira iha sela detensaun molok aprezenta bá primeiru interrogatóriu judisiál iha Tribunal Distritál Dili.
“Ita simu mandadu detensaun buska no apreensaun husi Tribunál atu halo detensaun bá ema na’in-tolu aumesmu tempu halo mós buska bá rezidénsia ha’at, suspeita ou prezumidu suspeitu komete krime falsifikasaun dokumentus, ita detein sira no sei aprezenta bá primeiru interrogatóriu judisiál,” dehan Adjuntu Diretór PSIK, Adino Cabral, iha nia knar fatin Ministériu Justisa, tersa ne’e.
Suispeitu na’in tolu ne’e ho inisiál hanesan S, AB no SS, suspeitu na’in-tolu ne’e, estranjeiru na’in ida, enkuantu na’in-rua sidadaun Timor.
“Ema na’in-tolu ne’ebé ita detein iha inisiál S, AB no SS, ita ida ita suspeita nia ema estranjeiru entre suspeitu sira seluk, ita sei aprezenta sira dentru 72 oras bá tribunal hodi halo validasaun bá buska ne’ebé ohin ita halo ho objetivu aprendidu sira-ne’ebé iha aumesmu tempu halo primeiru interrogatóriu judisiál bá arguidu sira,” afirma Adino.
Iha buska no apreensaun ne’e, PSIK prende mós evidénsia balun hanesan, komputadór dalaruma iha objetu krime, inklui dokumentu importante balun bá investigasaun.
“Ita suspeita nia halo falsifikasaun iha instituisaun estadu, ha’u la hatete fica bá segredu justisa, sei iha hela faze investigasaun, mais tama liu ona bá segredu justisa ha’u la ko’alia. Iha buska ne’e ita konsege halo apreensaun bá komputadores ne’ebé ita suspeita keta iha objetivu krime ruma, ou dokumentus balun ne’ebé importánsia bá investigasaun,” tenik nia.
Tuir informasaun ne’ebé smnews asesu sidadaun na’in-rua hanesan funsionáriu públiku ne’ebé hala’o knar iha instituisaun estadu balun.
Entretantu, relasiona ho krime ne’ebé diskonfia suspeitu na’in-tolu komete ne’e, viola ona kódiku penal Timor-Leste artigu 303 no ameasa pena prizaun tinan 3 no selu multa.(ant)
Komentariu