Smnewstl.com 18-10-2021 (Dili) – Diocese Maliana ne’ebe kompostu Suai, Ainaro, Liquica no Maliana rasik Segunda-feira ne’e marka tan istoria foun liu husi ordenasaun ba amo nain rua, Levinson da Conceicao Verdial husi Municipio Ainaro no Joanico Doutel Araujo Carvalho husi Posto Administrativo Bazartete, Municipio Liquica.
Ordenasaun ba Amo nain rua halao husi Bispo Diocese Maliana, Dom Norberto do Amaral, ne’ebe marka mos prezensa husi Arce Bispo Metropolitano, Dom Virgilho do Carmo da Silva no Bispo Diocese Baucau, Dom Basilio do Nascimento.
Iha momentu importante ba familia rua husi Ainaro no Liquica tamba oferese sira nia oan hodi lao tuir dalan kruz ne’e, Bispo Diocese Maliana Dom Norberto do Amaral rekuinese la fasil atu sai amo lulik la fasil ida.
“Estuda sai amo lulik ne’e laos hanesan fehuk ita tunu baku ba mai han ona, maibe tamba mai husi buat tolu, kuinese didiak tenki kuinese didiak maromak, komunikasaun ho maromak tenki lao diak inklui relasaun ho maromak tenki metin. Wainhira buat tolu ne’e metin ona foin maromak tau komfiansa hodi ba haklaken,”tenik Dom Norberto
Bispo Diocese Maliana ne’e rekuinese, serimonia ordenasaun ba amo lulik rua konsiderado espesial tamba laos deit marka prezensa husi familia rua, maibe mos husi Bispo Diocese Dili no Baucau inklui lider karsimatiku Kay Rala Xanana Gusmao.
Lori igreza katolika Timor Leste hato’o Bemvindo ba amo lulik nain rua iha dalan kruz no husu atu sai bibi atan diak ba srani sira.
Kay Rala Xanana ne’ebe hetan mos biban hodi hato’o mensagen hanesan lider nacional nomos matan dalan ba ukun rasik a’an dehan, timoroan tenki senti orgulho ba nia emar sira ne’ebe hili dalan atu servi srani sira tuir kruz tamba konsiderado la fasil hanesan ne’ebe ema hanoin no koalia.
Xanana agradese ba aman maromak ne’ebe haraik nia kbi’it tomak hodi lori familia husi Suai, Ainaro, Maliana no Liquica rasik ho kondisaun diak hodi partisipa iha momentu importante ne’e.
Eis Presidente Republika no Primeiro Ministro ne’e dehan, serimonia refere nakonu ho ambiente amizade nomos harmonia tamba halibur hamutuk srani sira espesial husi Ainaro ho Liquica inklui Diocese Baucau rasik.
Ikus liu, l antes hakotu lori familia rua inklui hirak ne’ebe partisipa iha serimonia ordenasaun, Xanana Gusmao hato’o parabens no husu atu sai exemplar no bibi atan diak hodi ba moris ho srani sira. (Rio)
Komentariu