Smnewstl.com 06-10-2021 (Dili) – Vise-Ministru Justisa, José Edmundo Caetano ho grupu traballu halo aprezentasaun datoluk kona-ba revizaun periódika universál bá aplikasaun direitu umanu iha territóriu nasionál.
Revizaun periódika universál ne’e hanesan mekanízmu ida konsellu direitu umanus ne’ebé establese iha tinan 2006 ne’ebé abranje husi nasaun estadu membrus Nasoens Unidas hamutuk 193.
“Konsellu ministru rona aprezentasaun relatóriu datoluk husi grupu traballu husi revizaun periódika universál bá aplikasaun direitus umanus iha territóriu nasionál ne’ebé aprezenta husi Ministériu Justisa,” informa Ministru Prezidénsia Konsellu Ministru, Fidélis Magalhães, hafoin remata enkontru konsellu ministru iha Palásiu Governu, kuarta ohin.
Timor-Leste submete mekanízmu avaliasaun ida-ne’e bá datoluk, hafoin halo revizaun periódika universál Timor-Leste nian ikus ne’ebé hala’o iha fulan Novembru tinan 2016.
Maibé iha siklu ida-idak, sei halo análize progressu iha situasaun direitus umanus iha posibilidade atu subliña asaun no medidas konkreta sira-ne’ebé foti hodi aplika rekomendasaun ne’ebé simu iha siklu revizaun anteriór nian.
Nune’e prevé katak, iha fulan Janeiru tinan 2022, Timor-Leste sei submete relatóriu kona-ba progressu no dezafiu sira kona-ba situasaun direitus umanus nasaun nian, hahú husi periódu tinan 2017 to’o tinan 2021.(ant)
Komentariu