Smnewstl.com 30-09-2021 (Dili) – Vise-Ministra Finansas, Sara Lobo Brites hateten, progressu ezekusaun Orsamentu Jerál Estadu (OJE) tinan fiskál 2021 ki’ik ne’ebé kontribui makas liu husi implementasaun projetu infraestrutura sira.
Sara Lobo hatutan, rajaun governu progressu ezekusaun OJE 2021 ki’ik, tanba kauza husi implementasaun serka sanitaria no konfinamentu obrigatóriu bá Covid-19 iha, tanba ne’e implika bá ezekusaun programa sira.
“Ezekusaun hanesan foin dadauk ita akompaña iha komité revizaun orsamentu, defaktu ezekusaun atraza, ezekusaun ki’ik, prontu ho situasaun ida-ne’ebé mak ho serka sanitaria ho konfinamentu obrigatóriu kontribui mós bá ida-ne’e, atrazu barak liu iha obras infraestruturas sira, tanba ne’e kontribui makas bá ezekusaun ne’ebé mak ki’ik, ha’u laiha nia dadus, tenki check nia dadus lai,” informa Vise MF, Sara Lobo Brites, iha otél Novu Turízmu, kinta ohin.
Maske la fó sai dadus ezekusaun atinji ona pursentu hira, maibé Sara Lobo afirma, durante fulan Outubru ho Novembru ne’e, governu sei halo esforsu atu aselera progressu ezekusaun bá OJE 2021.
“Espera katak, iha fulan outubru to’o dezembru ne’e ita bele aselera fila-fali atrazu sira-ne’e,” subliña Vise MF ne’e.
Iha parte seluk Governante ne’e relata tan katak, ezekusaun bá fundu Covid-19 nian mós ki’ik, fundu refere iha nia sub-programa rasik, tanba ne’e, mekanizmu ezekusaun depende bá pedidu ministériu sira, liu-liu papel ministériu saúde nian hodi atende bá iha kuarentena ho izolamentu sira.
Maibé enfelizmente kondisaun iha saúde nia progressu la’o neineik tebes, ne’eduni ezekusaun atu la’o di’ak, bainhira atividade ne’ebé aumenta.
“Portantu, ezekusaun só la’o kuandu atividades sira-ne’e aumenta, agora kondisoens iha saúde ne’e rasik mós nia progressu karik la’o neineik hela, ne’ebé ita espera katak, fulan tolu ne’e, hotu-hotu bele servisu makas atu bele aselera, desde agora ita lívre ona ita bele aselera fila-fali ezekusaun,” afirma nia.
Entretantu, tuir dadus ne’ebé Smnewstl.com asesu husi Portal Transparánsia governu nian relata katak, ezeksaun bá OJE 2021 atinji ona 52.0% ne’ebé kompostu husi orijen hamutuk $2,030,299,999.98, kompromísu sira $122,554,781.76, obrigasaun sira $115,968,975.43, atuál $938,997,009.71 no totál saldo $852,779,333.08.(ant)
Komentariu