Smnewstl.com 20-09-2021 (Dili) – Ministru Administrasaun Estatal (MAE), Miguel Perreira de Carvalho, Segunda-feira ohin, fó tomada de posse bá Prezidente Autoridade Munisípiu Dili, Guilhermina Filomena Saldanha Ribeiro hodi troka Prezidente sesan Gaspar Soares.
Iha diskursu, Ministru MAE, Miguel Perreira de Carvalho hateten, bá dala uluk, feto iha oportunidade hodi lidera kapitál nasaun hanesan Prezidente Autoridade Munisípiu Dili ho mandatu tinan.
Tanba ne’e, Miguel Perreira de Carvalho agradese bá, emposadu Guilhermina Filomena Saldanha Ribeiro, tanba bele konkore bá vaga Prezidente Autoridade Munisípiu Dili, no klasifikadu duni bá primeiru lugar, to’o hetan konfiansa husi governu sentrál hodi lidera capital nasaun ne’e.
“Haree bá prinsípiu igaldade jéneru, ha’u primeiru lugar hakarak kongratula ekipa júri sira husi komisaun funsaun públika no ministériu administrasaun estatal ne’ebé ho korajen rekomenda bá governu sentrál hodi nomeia feto primeiru hodi lidera munisípiu Dili. Ha’u mós hato’o obrigadu bá señora Guilhermina Ribeiro, ne’ebé mós korajen konkore iha selesaun por méritu to’o ikus klasifikada duni iha primeiru lugar no hetan konfiansa husi governu sentrál hodi lidera munisípiu Dili,” dehan Ministru Miguel.
Governante ne’e hatutan, Prezidente Autoridade Munisípiu Dili, mak reprezenta governu sentrr’al hodi asegura funsionamentu normal servisu administrasaun lokál estadu nian iha munisípiu Dili.
Maibé, tarefa servisu Prezidente Autoridade Dili nian boote tebes, ne’ebé iha mós dezafius oi-oin, nune’e bele garante servisu administrasaun ne’ebé mak deskonsentra ona iha munisípiu sira hodi implementa tuir planu estratéjiku 2011-2030.
“Nu’udar reprezentante governu sentrál iha munisípiu, Prezidente Autoridade Dili, ezérse kompeténsia sira-ne’ebé governu deskonsentra ona bá iha munisípiu Dili, nomeadamentu kompeténsia iha domíniu edukasaun, saúde, seguransa alimentár, obras públikas no transporte água no saneamentu no ambiente,” subliña nia.
Sorin seluk, Prezidente Autoridade Dili Foun, Guilhermina Filemena Saldanha Ribeiro agradese bá konfiansa ne’ebé governu sentrál fó bá nia hodi lidera munisípiu Dili.
Guilhermina afirma, nia kontinua de’it programa ne’ebé mak sekretáriu munisípiu Dili sira aprezenta ona iha Komisaun Revizaun Orsamentu Polítiku (KROP) iha Orsamentu Jerál Estadu (OJE) 2022.
“Ha’u seidauk haree planu munisípiu ninian ohin foin posse, maibé ha’u kompromete katak, planu saida mak ita-nia sekretáriu munisípiu aprezenta ona bá governnu iha KROP, konserteza ida-ne’e mak sei sai mós planu prioridade,” dehan nia.
Guilhermina promete, sei servisu hamutuk ho entidade hotu iha munisípiu Dili ne’e, tanba atu halo sidadaun Dili sai furak liu, la’ós responsabilidade Prezidente Autoridade nian de’it, maibé sidadaun tomak nian inklui ema estranjeiru sira-ne’ebé mak hela iha capital Dili.
“Dili la’ós hanesan munisípiu sira seluk, nia hanesan capital nasaun nian, ha’u mesak de’it labele, servisu ne’e tenki koopera tenki koordena ho hotu-hotu. Tanba ne’e mak, atu sai Dili bonita, atu sai Dili kapas, la’ós de’it Prezidente Autoridade Munisípiu nia responsabilidade, maibé sidadaun sé de’it mak hela iha munisípiu Dili, ne’e iha responsabilidade atu hadi’a Dili, hamoos Dili, halo boniitu Dili,” afirma nia.
Nune’e mós Prezidente Autoridade Munisípiu Dili sesante, Gaspar Soares mós agradese bá konfiansa ne’ebé mak fó bá nia durante ne’e, no agradese mós bá administradór postu anterior, autoridade lokál inklui funsionáriu sira iha munisípiu Dili seluk tan, ne’ebé durante ne’e konsege servisu hamutuk ona hodi hadi’a capital nasaun ne’e.
“Ha’u agradese bá fi’ar ne’ebé fó mai ha’u durante ne’e, no mós aproveita agradese bá parte hotu-hotu liu-liu diretores sira iha munisipál Dili tomak, administradór postu anterior sira, amu liurai no membrus konsellu suku tomak, konsellu veteranus, komandante PNTL munisípiu, bá servisu hamutuk no ajuda tomak durante ha’u assume kargu hanesan Prezidente Autoridade Munisipál Dili,” dehan Gaspar.
Entratentu, partisipa iha serimónia tomada de posse bá PAM Dili ne’e, Vise MAE, Lino de Jesusu Torrezão, Sekretária Estadu Igualdade Inkluzaun, Maria José Fonseca, Provedora PDHJ, Jusuina Maria Gomes, autoridade lokál sira iha Munisípiu Dili, inklui entidade sira seluk tan.(ant)
Komentariu