́ – ́

Smnewstl.com| MANILA, Filipinas, 15 Novembru 2026 – Media Center ne’ebé prepara ba kobertura Simeira ASEAN ba dala-49 iha Manila, Filipinas, sai referénsia importante ba Timor-Leste atu prepara infraestrutura, ekipamentu no servisu tékniku komunikasaun sosiál, antes nasaun ne’e asume knaar nu’udar prezidente no anfitriaun ASEAN iha 2029.

ADVERTISEMENT
SCROLL FILA BA NOTISIA


Ho Timor-Leste hetan konkordánsia husi lider ASEAN sira atu sai prezidente no anfitriaun organizasaun rejionál ne’e iha 2029, Sekretáriu Estadu Komunikasaun Sosiál, Expedito Dias Ximenes, hamutuk ho Ministra Finansas, Santina José Rodrigues F. Viegas Cardoso, vizita diretamente Media Center iha Manila atu observa infraestrutura, ekipamentu no sistema servisu ne’ebé fasilita jornalista husi nasaun membru ASEAN no nasaun parseiru sira.

Vizita ne’e iha objetivu atu komprende padraun preparasaun no jestaun Media Center Filipinas, hodi sai aprendizajen ba Timor-Leste, liuliu iha planeamentu no dezenvolvimentu infraestrutura media ba organizasaun eventu internasionál boot iha 2029.

Iha entrevista ho jornalista sira, Expedito Dias Ximenes esplika katak vizita ne’e hala’o atu haree diretamente kondisaun servisu jornalista sira nian, inklui jornalista Timor-Leste sira ne’ebé hala’o kobertura iha Simeira ASEAN ba dala-49.

Lee Mós:
Governo Hahu Produz Pontus Exame Nasionál

Nia apresia katak Media Center Manila iha infraestrutura no ekipamentu modernu ho kualidade aas, ne’ebé bele simu jornalista no profisionál media rihun lima resin husi nasaun membru ASEAN no nasaun parseiru sira.

“Media Center iha Filipinas ne’e di’ak tebes. Infraestrutura no ekipamentu ne’ebé sira iha hatudu katak preparasaun ba eventu internasionál hanesan Simeira ASEAN presiza planeamentu no investimentu ne’ebé di’ak. Ida-ne’e sai referénsia ba Timor-Leste atu aprende no prepara an hodi bele hala’o servisu hanesan ne’e iha tinan 2029,” dehan Expedito Dias Ximenes.

Nia enfatiza katak jornalista sira iha responsabilidade importante atu asegura informasaun ne’ebé kredível, profisionál no ho kualidade, liuhusi meiu komunikasaun ne’ebé disponivel, hodi bele hato’o informasaun ba públiku tomak.

Tuir Expedito, Timor-Leste presiza aproveita oportunidade ne’e atu aprende husi esperiénsia Filipinas no fahe koñesimentu ho nasaun sira ne’ebé iha esperiénsia iha organizasaun eventu internasionál, liuliu iha área komunikasaun no media.

Lee Mós:
Dame Hahu Husi Komunidade : HWPL No Parseiru Lokal Transforma Parede Iha UNPAZ.

Nia mós manifesta esperansa katak bainhira Timor-Leste asume responsabilidade nu’udar prezidente no anfitriaun ASEAN iha 2029, nasaun ne’e bele prepara an ho di’ak, inklui iha área media, atu hala’o knaar ho profisionalizmu no hatudu kapasidade Timor-Leste iha nivel internasionál.

Timor-Leste Konfirma Anfitriaun Simeira ASEAN 2029

Iha okaziaun ne’e, Expedito Dias Ximenes mós hato’o kongratulasaun ba Governu Timor-Leste tanba konkordánsia ne’ebé hetan iha plenáriu dahuluk Simeira ASEAN ba dala-49, kona-ba Timor-Leste sai anfitriaun no prezidente ASEAN iha 2029.

Nia hato’o apresiasaun ba Primeiru-Ministru, Ministru Negósiu Estranjeiru no Kooperasaun, Vise-Ministra Asuntu ASEAN no instituisaun relevante sira seluk, tanba servisu no kompromisu ne’ebé sira hala’o durante prosesu preparasaun to’o Timor-Leste hetan konfirmasaun atu simu responsabilidade importante ne’e.

Prezidénsia ASEAN sei tuir sistema rotasaun entre nasaun membru sira, ho Singapura iha 2027, Tailándia iha 2028 no Timor-Leste iha 2029.

Lee Mós:
Submete Tarde, PPN La Admite Proposta 18 Halo Diskusaun

Ministra Finansas no SEComS Hato’o Apoiu ba Jornalista Timor-Leste

Depois remata observasaun iha Media Center, Ministra Finansas hamutuk ho Sekretáriu Estadu Komunikasaun Sosiál kontinua sira-nia vizita ba delegasaun jornalista Timor-Leste ne’ebé hala’o kobertura iha Manila, husi RTTL-EP, SMNews Timor, GMN TV, Timor Post no STL Media.

Iha enkontru ne’e, Ministra Finansas no Sekretáriu Estadu Komunikasaun Sosiál hato’o parabéns no apresiasaun ba jornalista sira-nia servisu durante kobertura Simeira ASEAN ba dala-49 iha Manila, Filipinas.

Vizita ne’e mós sai forma ida atu fó apoiu no hametin motivasaun ba jornalista Timor-Leste sira ne’ebé hala’o knaar atu relata no divulga informasaun kona-ba partisipasaun Timor-Leste iha eventu internasionál importante ne’e.

Ho esperiénsia no aprendizajen husi Media Center Manila, Timor-Leste iha oportunidade atu prepara an sedu, liuliu iha infraestrutura, rekursu umanu, ekipamentu no kapasidade téknika, hodi asegura preparasaun di’ak ba setor media bainhira nasaun ne’e asume responsabilidade nu’udar anfitriaun Simeira ASEAN iha 2029.