Smnewstl.com Dili,11 Novembru 2026– Tailándia ho Timor-Leste sei prepara Memorandu Entendimentu (MoU) kona-bá kooperasaun militár no dezenvolvimentu kapasidade forsa armada nasaun rua nian, nu’udár parte hosi preparasaun bá komemorasaun aniversáriu dala-25 relasaun diplomátika iha tinan 2027.
Asuntu ne’e nu’udár rezultadu hosi enkontru entre Primeiru-Ministru (PM) Timor-Leste, Kay Rala Xanana Gusmão, ho Xefe Forsa Defeza Reinu Tailándia, Jenerál Ukris Boontanondha ho delegasaun, iha Salaun Enkontru Gabinete Fronteira Terrestre no Marítima, Palásiu Governu, Dili, kuarta (11/11).
Iha deklarasaun bá mídia, Jenerál Ukris Boontanondha hateten katak MoU ne’ebé sei elabora sei kobre área importante sira, inklui apoiu edukasaun no formasaun militár, kooperasaun iha operasaun manutensaun dame Nasoins Unidas (ONU), no interkámbiu péritu entre forsa armada nasaun rua nian.
“Atu implementa kooperasaun ne’e, nasaun rua sei estabelese mekanizmu bilaterál entre forsa armada Tailándia no Força de Defesa de Timor-Leste (F-FDTL), atu koordena no promove atividade sira ne’ebé konkorda ona,” Jenerál Ukris Boontanondha.
Iha área manutensaun dame, Tailándia fó ona apoiu bá Timor-Leste liuhosi kursu no formasaun. Iha kooperasaun ne’e, nasaun rua konsidera mós posibilidade atu konvida membru F-FDTL sira partisipa hamutuk ho militár Tailándia iha misaun manutensaun dame ONU nian iha futuru.
Aleinde ne’e, enkontru ne’e mós aborda kooperasaun iha área asisténsia umanitária no apoiu bá populasaun. Tailándia iha sentru formasaun espesífiku bá asisténsia umanitária, ne’ebé organiza treinamentu regularmente kada tinan.
“Ha’u sei lori fila-fali bá Tailándia rekomendasaun no perspetiva sira ne’ebé PM Xanana Gusmão hato’o, atu konsidera no aplika tuir kontektu no nesesidade dezenvolvimentu iha Tailándia,” nia promete.
Iha kontestu ne’e, PM Xanana Gusmão propoin atu forsa armada nasaun rua nian hamutuk hala’o operasaun asisténsia umanitária, servisu hamutuk iha misaun ida, la’ós hala’o atividade separadamente.
PM Xanana Gusmão mós hato’o importánsia konservasaun natureza no protesaun ambiente nu’udár elementu importante bá dezenvolvimentu sustentável.
Kooperasaun ne’e sei kontribui bá esforsu hametin relasaun amizade no parseria entre Tailándia ho Timor-Leste, liuliu iha área defeza, seguransa, asisténsia umanitária no dezenvolvimentu sustentável.
Akompaña Primeiru-Ministru, Kay Rala Xanana Gusmão iha enkontru ne’e maka Ministru Interiór, Francisco da Costa Guterres, Diretór-Jerál Polítika Defeza Nasionál, Nuno Carvalho dos Santos ho Primeira Sekretária no mós Asistente Reprezentante Permanente bá ESCAP iha Embaixada Repúblika Demokrátika Timor-Leste iha Reinu Tailándia, Merina Úrsula Xareal.
Enkuantu Jenerál Ukris Boontanondha akompaña hosi Embaixadór Tailándia iha Timor-Leste, Atipat Rojanapaibulya, Diretór Intelijénsia Konjunta, Tenente-Jenerál Songvit Vayuheurd, Diretór OER, J2, Forsa Armada Reinu Tailándia (RTARF), Vise-Almirante Chitpol Korkitsammakul, Diretór Sentru Operasaun Manutensaun Dame, J3, Forsa Armada Reinu Tailándia (RTARF), Kontra-Almirante Phuvadon Vorasindh.
Komentariu