SMnewstl.com | Sydney, 6 Novembru 2026 – Distánsia la’ós razaun atu haketak sidadaun Timor-Leste sira hosi prosesu demokrátiku nasaun nian. Maski hela no servisu iha rai estranjeiru, komunidade Timor-Leste iha Austrália kontinua iha direitu atu partisipa iha prosesu eleitorál no kontribui ba futuru demokrasia Timor-Leste nian.
Hodi asegura partisipasaun ne’e, Ministru Administrasaun Estatál (MAE), Tomás do Rosário Cabral, halo enkontru ho komunidade Timor-Leste iha Sidade Sydney, Austrália, hodi mobiliza sidadaun sira atu partisipa ativu iha prosesu resenseamentu eleitorál.
Durante enkontru ne’e, Ministru Tomás do Rosário Cabral esplika katak resenseamentu eleitorál importante atu atualiza dadus eleitorál sidadaun Timor-Leste nian, inklui fasilita mudansa hosi kartaun eleitorál manual ba kartaun eleitorál ho sistema biométriku.
Governante mós afirma katak informasaun eleitorál ne’ebé atualizadu sei ajuda atu determina númeru eleitor sira iha kada rejiaun no fasilita planeamentu sentru votasaun ne’ebé besik ba komunidade Timor-Leste iha rai-li’ur.
Ministru MAE,enkoraja sidadaun sira ne’ebé seidauk halo rejistu atu aproveita oportunidade ne’e, tanba prosesu resenseamentu no kartaun eleitorál gratuitu. Nia husu mós ba komunidade atu sensibiliza família, kolega no maluk sira seluk atu partisipa, hodi nune’e ema hotu bele atualiza sira-nia dadus eleitorál.
Ba Governu, partisipasaun sidadaun sira iha rai-li’ur iha importánsia boot, tanba direitu votu nu’udar instrumentu ida ne’ebé permite sidadaun sira kontinua partisipa iha desizaun demokrátika nasaun nian, maski hela dook hosi territóriu nasionál.
Iha enkontru ne’e, Ministru Tomás do Rosário Cabral hato’o apresiasaun ba komunidade ne’ebé aloka tempu atu partisipa, maski iha kompromisu ho servisu no atividade loroloron. Nia mós agradese ba Embaixada, Konsuladu no diplomata sira ba sira-nia servisu no kolaborasaun hodi mobiliza komunidade.
Enkontru ne’e sai oportunidade atu hametin kooperasaun entre instituisaun Estadu no komunidade Timor-Leste iha Austrália, ho objetivu atu asegura katak sidadaun sira iha rai-li’ur kontinua iha ligasaun ho prosesu eleitorál no dezenvolvimentu demokrátiku Timor-Leste nian.
Komentariu