SMnewstl.com SEOUL, KOREIA DO SUL, 3 NOVEMBRU 2026 – Vice-Ministra Negósiu Estranjeiru no Kooperasaun, Jesuína Maria Ferreira Gomes, to’o ona iha Repúblika Koreia hodi hala’o preparasaun no koordinasaun diplomátika ba vizita ofisiál Prezidente Repúblika Demokrátika Timor-Leste, José Ramos-Horta, ne’ebé sei hasoru Prezidente Repúblika Koreia, Lee Jae-myung, husi loron 5 to’o 7 fulan Novembru 2026.

Iha Seoul, Vice-Ministra Jesuína Maria Ferreira Gomes simu diretamente husi Embaixadór Timor-Leste iha Repúblika Koreia, António de Sá Benevides. Enkontru inisiál ne’e kontinua ho briefing no koordenasaun diplomátika kona-ba preparasaun no programa vizita ofisiál Prezidente Repúblika, ne’ebé hala’o iha edifísiu Embaixada Timor-Leste, lokalizadu iha Seoul, Repúblika Koreia.

ADVERTISEMENT
SCROLL FILA BA NOTISIA


Preparasaun ne’e importante atu asegura katak programa vizita ofisiál Prezidente Repúblika hala’o ho di’ak, liuhusi koordenasaun entre instituisaun diplomátika Timor-Leste no autoridade relevante sira iha Repúblika Koreia.

Lee Mós:
Austrália Apoiu Milliaun $4 Solusiona Problema Be'e Moos Iha Dili

Vizita ofisiál Prezidente José Ramos-Horta nian ne’e hala’o tuir konvite ofisiál husi Prezidente Repúblika Koreia, Lee Jae-myung, no sei marka etapa importante ida iha hametin relasaun diplomátika no amizade entre Timor-Leste ho Repúblika Koreia.

Vizita ida-ne’e sei sai hanesan vizita bilaterál ofisiál dahuluk ba Koreia husi Prezidente Timor-Leste, desde nasaun rua estabelese relasaun diplomátika iha tinan 2002.

Prezidente Ramos-Horta, ne’ebé hetan Prémiu Nobel ba Dame iha tinan 1996, mós hato’o ona apresiasaun ba esforsu povu Koreia nian iha defeza no protesaun demokrasia, ne’ebé sai hanesan baze importante ba relasaun amizade entre nasaun rua.

Tuir programa ofisiál, iha loron 6 Novembru, Prezidente José Ramos-Horta no Prezidente Lee Jae-myung sei hala’o enkontru bilaterál no cimeira entre lider nasaun rua. Enkontru ne’e sei kontinua ho serimónia asinatura Memorandu Entendimentu (MoU), almosu estadu no konferénsia imprensa konjunta.

Lee Mós:
ME Acompanha Estudantes Vendedores do concursu Nacional do Ensino Básico do 3.° Ciclo de Manufahi Em Visita á Escola Santa Assumption College Kilmmore, Em Melbourne, Australi

Iha enkontru bilaterál ne’e, lider nasaun rua sei troka hanoin no diskute oportunidade sira atu hametin kooperasaun prátika iha área estratéjika oioin, inklui negósiu estranjeiru, seguransa, propriedade intelektuál, mudansa klimátika, edukasaun no troka entre povu ho povu, nune’e mós asuntu rejionál no dezenvolvimentu internasionál.

Durante períodu ne’ebé Timor-Leste restaura nia independénsia iha tinan 2002, Repúblika Koreia sai hanesan parseiru importante ne’ebé fó kontribuisaun ba prosesu hametin dame, demokrasia no dezenvolvimentu ekonómiku no sosiál iha Timor-Leste.

Apoiu ne’e inklui kontribuisaun ba operasaun manutensaun dame Nasoins Unidas (ONU), liuhusi Unidade Sangnoksu, apoiu ba prosesu eleisaun no programa kooperasaun dezenvolvimentu.

Iha parte seluk, Timor-Leste mós kontinua hametin parseria ho Repúblika Koreia iha forúm no organizasaun internasionál. Ho Timor-Leste sai membru númeru 11 ASEAN iha tinan 2025, oportunidade kooperasaun entre nasaun rua ne’e, liuliu iha kuadru parseria entre Repúblika Koreia no ASEAN, sai importante liután.

Lee Mós:
Autoridade Seguransa Klarifika ba Publiku Kazu Levi Gomes Nia Mate, 75% Oho A'an

Vizita ofisiál ida-ne’e hala’o molok komemorasaun tinan 25 ba estabelesimentu relasaun diplomátika entre Timor-Leste no Repúblika Koreia, ne’ebé sei marka iha tinan 2027. Tanba ne’e, vizita ne’e konsidera hanesan oportunidade estratéjika atu aprofunda konfiansa, hametin amizade no haforsa kooperasaun bilaterál iha futuru.

Liuhusi vizita ida-ne’e, espera katak Timor-Leste no Repúblika Koreia sei kontinua hametin relasaun parseria iha baze konfiansa no benefísiu mútu, promove dezenvolvimentu sustentável, dame no prosperidade rejionál, no haforsa kooperasaun ba interese komún entre nasaun rua.

Lee nain: 3