Smnewstl.com | Baucau, 04 Novembru 2026- Komandante Polísia Nasionál Timor-Leste (PNTL) Munisípiu Baucau, Superintendente Xefe Polísia João Sanches Pires, relata katak asidente tráfiku fatal ida akontese iha área Kaisido Diresaun Estrada Foun ne’ebé liga ba Kairabela, iha tersa feira ne’e, rezulta labarik feto ida ho idade tinan haat mate iha fatin akontesimentu no na’in-tolu seluk sofre kanek.
Komandante PNTL Munisípiu Baucau esplika katak asidente ne’e akontese bainhira motorista ne’ebé komdus Motorizada ho kondisaun lanu nune’e motorizada halai taka dalan ba Diresaun kareta nian, hodi hamosu kolizaun entre veíkulu rua ne’e.
“Horseik akontese asidente fatal ida iha área Kaisido, tanba motorista ho kondisaun lanu hala’i motorizada no taka ema nia dalan, nune’e soke kareta. Depois kareta rasta vítima to’o ikus labarik ida mate, no ema na’in-tolu seluk kanek, ne’ebé submete kedas ba ospitál atu halo tratamentu,”Komandante PNTL Munisípiu Baucau João Sanches Pires relata ba Jornalista sira iha Knar fatin Baucau kuarta ne’e.
Komandante ne’e Haktuir labarik ne’ebé lakon vida iha asidente ne’e ho naran Juvenia da Silva tinan haat,hafoin akontesimentu, família deside lori kedas isin mate husi labarik ne’e ba nia moris-fatin iha Suku Bucoli, Munisípiu Baucau.
Enkuantu vítima na’in-tolu seluk ne’ebé sofre kanek, evakua kedas ba ospitál hodi hetan tratamentu médiku.
Komandante PNTL ne’e mós afirma katak polísia kontinua rekolla dadus no hala’o prosesu investigasaun tuir prosedimentu legál atu determina kauza no responsabilidade husi asidente fatal ne’e.
“Polísia nafatin rekolla dadus, no prosesu mós kontinua lao tuir nia dalan. Ita bele aprezenta kazu ne’e ba Ministériu Públiku atu halo prosesu tuir lei,maibe depende mos ba vitima ho suspeito karik iha konkordánsia parte rua,, maibé prosesu legál tenke kontinua,”Komandante ne’e afirma.
Autoridade seguransa nafatin kontinua hala’o investigasaun atu klarifika faktu sira kona-ba asidente ne’e no determina responsabilidade tuir lei ne’ebé vigora.
Komentariu