Smnewstl.com Dili,22 Outubro 2026-Konstrusaun edifísiu Sala Pediatria Andar Lima iha Hospital Nasionál Guido Valadares (HNGV) atinje ona 100%, maibé instalasaun ekipamentu no preparasaun sistema apoiu ba operasaun sei kontinua,molok edifísiu ne’e hahú presta servisu saúde ba labarik sira.
Hafoin remata reuniaun Konsellu Ministrus iha Palasio do Governu Iha kuarta ne’e, Ministra Saúde, Elia dos Reis Amaral, konfirma maski servisu konstrusaun remata ona, maibe sei presiza kompleta instalasaun ekipamentu atu asegura edifísiu ne’e prontu ba utilizasaun.
Ministra Saúde mós esplika Atu garante servisu saúde ne’ebé di’ak no seguru, edifísiu pediatria ne’e sei presiza sistema eletrisidade ho kontadór kilowatt-hour (kWh) rasik. Sistema ne’e importante atu responde ba nesesidade eletrisidade no suporta funsionamentu ekipamentu médiku sira iha edifísiu ne’e.
Além ne’e, Ministériu Saúde prepara konektividade sistema oxijéniu husi instalasaun Pressure Swing Adsorption (PSA), ne’ebé instala ona iha kotuk HNGV, atu distribui oxijéniu ba unidade sira iha edifísiu pediatria ne’ebé sei hahú funsiona.
Ministra saude Elia dos Reis Amaral esplika katak,sei halo konektividade husi oxijéniu PSA ne’ebé tau ona iha ospital.
” Ita halo instalasaun oxijéniu ba kada piju hospital nian ne’ebé ita atu halo operasionál,” MS Elia dos Reis Amaral dehan.
Ministra Saúde enfatiza katak, atu edifísiu ne’e bele funsiona ho di’ak, presiza mós jestaun ne’ebé adekuadu, liuliu iha monitorizasaun ba sistema no ekipamentu sira, atu garante seguransa no kontinuidade servisu saúde ba pasiente pediátriku sira.(#Smnews/)
Komentariu