SMnewstl.com || Manufahi, 16 Agostu 2026 — Ministru Obras Públikas (MOP), Samuel Marçal, kontinua halo monitorizasaun direta ba progresu projetu infraestrutura iha territóriu laran. Iha monitorizasaun ne’e, Ministru identifika obra balu ne’ebé ezekusaun la tuir padraun kualidade no orienta kompanhia atu sobu no halo hikas parte obra ne’ebé la satisfaz.
Monitorizasaun ne’e hala’o iha Munisípiu Covalima, inklui Postu Administrativu Zumalai no Maukatar, no kontinua iha Munisípiu Manufahi, liuliu iha Postu Administrativu Same, Vila no Suku Betano.
Ministru Samuel Marçal hatete katak vizita ne’e la’ós de’it atu haree progresu projetu, maibé mós atu identifika diretamente problema sira ne’ebé akontese iha terenu, inklui projetu sira ne’ebé abandona ona ka la iha progresu tuir planu.
“Vizita ida ne’e mós atu haree projetu sira ne’ebé abandona. Sira ne’e problema saida? Tanba kompanhia mak la iha vontade atu servisu, ita sei hapara hotu no fó fali ba kompanhia seluk atu servisu,” dehan Samuel Marçal ba jornalista sira.
Iha área Oebaba, Zumalai, ekipa MOP identifika projetu drenajen ida ne’ebé ezekusaun obra la tuir padraun kualidade. Tanba ne’e, Ministru orienta kompanhia atu sobu parte obra ne’ebé la tuir espesifikasaun téknika no halo hikas fali tuir padraun ne’ebé determina.
Ministru Samuel Marçal esplika katak desizaun atu sobu no halo hikas obra la’ós ho objetivu atu kastigu kompanhia ka halo kompanhia sofre prejuízu, maibé atu asegura katak infraestrutura ne’ebé konstrui ho osan públiku iha kualidade no bele dura ba tempu naruk.
“Ne’e la’ós atu kastigu sira ka halo sira lakon. Ita rekonhese katak kompanhia sira sei iha hela faze aprende. Maibé ho problema hirak ne’e, kompanhia bele hetan esperiénsia, nune’e iha futuru bele manán fila fali konfiansa ne’ebé boot liután,” hateten Ministru.
MOP mós konsidera falta supervisaun iha terenu hanesan ida hosi fator sira ne’ebé bele kontribui ba problema kualidade obra. Tanba ne’e, Ministru subliña katak engenheiru no ekipa supervisaun tenke fó atensaun boot liután ba prosesu ezekusaun iha terenu.
Supervisaun ne’e importante atu asegura katak obra sira hala’o tuir dezenhu, padraun no espesifikasaun téknika ne’ebé estabelese iha kontratu.
“Hau ko’alia tiha ona iha semana hira ba kotuk katak hau ho ekipa tomak sei halo vizita ba obra sira hotu iha territóriu tomak, hahú husi estrada nasionál, munisipál to’o estrada rural, hotu-hotu. Ita sei haree progresu servisu iha terenu,” dehan Samuel Marçal.
Tuir Ministru, monitorizasaun direta iha terenu importante tebes atu Governu bele hatene problema real sira ne’ebé hasoru durante implementasaun projetu, inklui problema tékniku no sosial ne’ebé dala ruma bele sai obstákulu ba kompanhia sira atu kontinua servisu.
Nune’e, vizita ne’e mós sai oportunidade ba MOP atu rona diretamente preokupasaun no difikuldade sira ne’ebé kompanhia sira hasoru iha terenu, no buka solusaun hamutuk atu projetu bele kontinua tuir planu.
MOP afirma katak monitorizasaun regular no supervisaun rigorozu sei kontinua, ho objetivu atu asegura kualidade infraestrutura públika no garante katak osan públiku uza ho efetivu hodi fó benefísiu ba komunidade.
Iha monitorizasaun ne’e, Ministru Obras Públikas Samuel Marçal akompaña hosi Sekretáriu Estadu Asuntu Toponímia no Organizasaun Urbana, ekipa téknika MOP no Agência de Desenvolvimento Nacional (ADN).(/SMnews)
Komentariu