SMnewstl.com ||Díli, 16 Agostu 2026 — Ministru Negósius Estranjeirus, Komunidade no Defeza Nasionál Repúblika Cabo Verde, Manuel Augusto Lima Amante da Rosa ho delegasaun domingu ne’e to’o ona Timor-Leste, hodi partisipa iha 31.ª Reuniaun Ordinária Konsellu Ministru Komunidade Países de Língua Portuguesa (CPLP).
Reuniaun ne’e sei hala’o iha Díli, iha loron 19 fulan-agostu 2026 ne’ebé sei prezide husi Ministru Negósiu Estranjeiru no Kooperasaun (MNEK) Timor-Leste, Bendito dos Santos Freitas enkuantu Ministru Prezidénsia Konsellu Ministru CPLP Pro Tempore biéniu 2026-2027 ho partisipasaun reprezentante sira husi Estadu-Membru CPLP.
To’o Ministru Manuel Augusto Lima Amante da Rosa iha Timor-Leste simu husi Sekretáriu-Jerál Ministériu Negósius Estranjeirus no Kooperasaun (MNEC), Embaixadór Antonito de Araújo, ne’ebé akompaña husi Koordenadór-Jerál Komisaun Apoiu ba Prezidénsia CPLP, Joaquim Fernandes no Reprezentante Misaun Timor-Leste ba CPLP, Embaixadora Natália Carrascalão,
Prezensa delegasaun Cabo Verde nian iha Timor-Leste reflete partisipasaun ativa país ne’e iha prosesu kooperasaun no diálogu polítiku CPLP, liuliu iha reuniaun ministeriál ne’ebé sei halo análiza ba matéria estratéjika ba organizasaun.
31.ª Reuniaun Ordinária Konsellu Ministru CPLP ne’e nu’udar parte husi ajenda Prezidénsia Pro Tempore Timor-Leste nian. Entre matéria sira-ne’ebé sei diskute inklui Estadu Direitu Demokrátiku, Mobilidade, Juventude, Kooperasaun Ekonómika no Emprezariál, Protesaun Sosiál, Oseanu, Mudansa Klimátika, Saúde Públika no Língua Portugeza.
Prezidénsia Pro Tempore Timor-Leste hala’o ho tema “Konsolidasaun Estadu Direitu Demokrátiku: Dezafiu sira ba CPLP”, ho objetivu atu hametin kooperasaun no koordenasaun entre Estadu-Membru sira iha área polítika, diplomátika no dezenvolvimentu.(/Smnews)
Komentariu