smnewstl.com| Manufahi, 12 Agostu 2026 — Organizasaun Special Olympics Timor-Leste realiza Jogu Regional X ba atleta ho defisiénsia intelektuál iha Munisípiu Manufahi, ho partisipasaun atleta sira husi Munisípiu Aileu, Ainaro, Covalima no Manufahi.
Eventu desportivu ne’e sai hanesan plataforma importante atu promove inkluzaun sosiál, igualdade no oportunidade, nune’e mós atu dezenvolve kapasidade no konfiansa-an ema ho defisiénsia intelektuál liuhusi atividade desportiva.
Sekretária Munisípal Manufahi, Filomena da Costa Nunes, ne’ebé reprezenta Prezidente Autoridade Munisípiu Manufahi, hateten katak eventu ne’e iha importánsia boot ba komunidade, liuliu tanba fó oportunidade ba atleta ho defisiénsia intelektuál atu partisipa ativu iha atividade desportiva.
“Ha’u reprezenta Autoridade Munisípiu no povu Manufahi tomak sente kontenti tebes ho eventu ida ne’e. Ha’u mós agradese ba Komisaun Organizadora tanba bele realiza atividade ida ne’ebé importante tebes iha Munisípiu Manufahi,” dehan Filomena.
Nia sublinha katak kompetisaun ne’e la’ós deit kona-ba manán ka hetan vitoria, maibé mós atu harii amizade, unidade no solidariedade entre atleta sira.
“Eventu ida ne’e la’ós deit atu hatudu ita nia jogu hodi manán. Maibé, importante liu mak ita bele hatudu domin, kria amizade no unidade, maski ita hotu hasoru difikuldade oioin,” nia hateten.
Iha sorin seluk, Prezidente Special Olympics Timor-Leste, Maria Domingas Fernandes, hateten katak objetivu prinsipal husi atividade ne’e mak atu asegura ema ho defisiénsia intelektuál la hetan diskriminasaun no la sente katak sira diferente iha sosiedade.
Nia hateten katak, maski organizasaun enfrenta limitasaun orsamentu, Special Olympics Timor-Leste kontinua buka dalan atu realiza atividade desportiva iha munisípiu sira.
“Objetivu ami nian mak atu asegura katak ema ho defisiénsia intelektuál la hetan diskriminasaun. Ami sei kontinua buka dalan atu realiza eventu sira iha munisípiu, tanba ami fiar katak ema hotu-hotu iha direitu atu partisipa iha sosiedade,” dehan Maria Domingas.
Jogu Regional X ne’e fó mós oportunidade ba atleta sira husi Aileu, Ainaro, Covalima no Manufahi atu hasoru malu, troka esperiénsia no dezenvolve sira-nia kapasidade liuhusi desportu.
Atividade Special Olympics ne’e realiza dala ida kada tinan rua. Iha edisaun tinan ida ne’e, Manufahi sai anfitriaun ba kompetisaun, ho partisipasaun direta husi reprezentante ASEAN no Pasífiku, ne’ebé antes nunka partisipa diretamente iha atividade hanesan ne’e.
Maria Domingas mós hato’o mensajen ba atleta sira atu la sente mesak ka diskriminadu, tanba desportu bele sai meiu ida atu dezenvolve kapasidade, konsentrasaun no konfiansa-an.
“Eventu ida ne’e hatudu katak ita la mesak no ita la hetan diskriminasaun. Maski iha atividade balun ita bele hasoru difikuldade, liuhusi desportu ita bele dezenvolve ita nia kapasidade, konsentrasaun no konfiansa-an,” nia hateten.
Eventu ne’e hetan apoiu husi Ministériu Solidariedade Sosiál no Inkluzaun (MSSI) no Ministériu Juventude, Desportu, Arte no Kultura (MJDAC).
Enkuantu, atleta Alberto Regos de Araujo hateten katak nia sente orgullu bele partisipa iha Jogu Regional Special Olympics.
“Ha’u sente orgullu tebes tanba ha’u hanesan atleta ida ne’ebé sempre partisipa iha eventu ida ne’e. Ha’u mós agradese tebes ba Komisaun Organizadora tanba bele realiza atividade ida ne’ebé fó oportunidade ba ami atleta sira atu hasoru no konese malu liután,” dehan Alberto.
Jogu Regional X Special Olympics Timor-Leste espera kontinua sai plataforma importante atu promove desportu inkluzivu, igualdade no partisipasaun ativa ba ema ho defisiénsia intelektuál iha Timor-Leste.
Komentariu